AMED - Mamosteya MED-DERî Seyhan Şaşmaz derheqê plansazîyê MED-DERî yê seba 21ê Sibate Roja Ziwanê Dayîke ya Dinya de qisey kerd û dîyar kerd ke a roje de bi bernameyê tewir bi tewir û pirr derbaz bikerê.

 

21ê Sibate serra 1999 de hetê rêxistinê Neteweyê Yewbîyaye; Sazgehê Perwerdeyî, Kultur û Zanistî (UNESCO) sey roja Ziwanê Dayîke Ya Dinya îlan kerd. Bi 21 serrî yo ke temamê dinya de yeno pîrozkerdene. Tirkîya de ziwanê sey kurdî, çerkezî, lazî, pomak, suryanî bi temamî 18 ziwanî yenê qiseykerdene. La tena tirkî esas yena girewtene û ziwanê fermî yê dewlete yo. Coka ziwanê bîn zî bi hêriş û polîtîkayê asîmlasyonî dir rî bi rî manenê.

 

Komelaya Cigêrayîşê Kultur û Ziwanê yê Mezopotamya (MED - DER) amadekarîya 21ê Sibate keno. Derheqê babete de mamosteya MED-DERî Seyhane Şaşmaz qisey kerd.

 

‘Perwerdeyê ma bi rayîrê onlînê yenê dayene'

 

Mamoste Seyhane Şaşmaz destpêkê qiseykerdişê xo de bale ant serê xebatê komele û vat hîna zaf xebate xo serê onlîne de kenê û wina vat: "Seke yeno zanayîş seba rewşa pandemî ma dersê xo yê kurmancî û kirmanckî serê bernameyê Zoomî de dewam kenê. Xeylêk muracatê dersan estê û dersê ma eleqeyêk pîl vînenê. Wexto ke ma dest bi xebate xo kerd, bi rastî ma zî endîşeyîn bî. Seba ke dersê bi rayîrê onlîne ma rê çîyêk newe bi. Helbet avantajê ci zî estbî. Seba ke verê tena kesê ke Amed de bî eşkayîne perwerde bigîrê. La nika bi rayîrê online heme şaristan û welatê teberî ra kesê ke biwazê kurdkî bimusê xo resnenê ma."

 

'Ma do 21ê Sibate bi bername û panelan derbaz bikerê'

 

Seyhane dîyar kerd ke do 21ê Sibate bi bernameyê cîya û panel derbaz bikerê û vat: "Seke mi ardibi ziwan, emsar serra parên ra cîya ya. La ma xebatê xo nêdayî vindarnayîş. Yew nînan ra Komeleya “MED-DER” û “Tora Ziwan û Kulturê Kurdkî” do heme xebatê ziwanî cayê xo bigîrê. Sewbîna do seba TV zî potê girîngîyê ziwanî qal kenê, bêrê viraştiş. A roje do hastagêk bêro amadekerdene. Bi rayberîya Tora Ziwan û Kulturê Kurdkî de serê medyaya dîjîtalî de eşkerayî bêra dayene û bernameyî bêrê viraştene. Reyna do Tora ziwan û Kulturê Kurdkî û Platformê Ziwanê Kurdkî do kampanya bêro destpêkerdene. MED-DER, Penê Kurdî û Komeleya Edebîyatkarê Kurdî de seba nuştoxê zîndanan de yê kartan bierşawê. Mabêne 21ê Sibate û 15ê Gulane de do bi ruhu seferberî xebatê seba ziwanî bêrê kerdene. Do seba a roje rêzevîdyo bêrê vilakerdene. Sewbîna do derheqê girîngîyê ziwanî de dosya bêrê amadekerdene. Vîdeoyan do wendekarê ma biancê. Ma wazenê ke wendekarê ma yê nika ders gênê girîngî na roje bîyarê serê ziwan."

 

Seyhane qiseykerdişê xo wina qedêna: "Vengdayîşê mi seke mi vat tena nê rojan de ney, ma her roje girîngiyê ziwanê Kurdkî bîyarê vîrê xo û qal bikerê. Ziwanê m aganî her wext vîrê ma de bo. Seba ke her qadê cuye de lazimî bi ziwan esto. Coka kesê ke wazenê kurdkî bimusê, wa qeydê xo serê online viraznê û perwedeyî bigîrê."