MÛŞ - Aysel seba wendişê tutanê xo verê xo dana Gimgim, tîya de xeylêk zehmetîyê xidarî dir rî bi rî manena. Seba Ayselê çend cuya dewe zehmet bo zî têkiliyê dewe hîna bi wate vînena.

 

Cinîya bi nameyê Aysel Kuçukçelekî ke Gimgimê Muşî de ciwîyena, yew cinîyêka seba wendişê tutanê xo dewa xo terk bikero ya. Aysele vera cuya şaristanî hewl dana ke şaristan de cuya kolektîf bido ciwîyayîş.

 

Aysele bi eslê xo dewa Kaniye Mera ya Gimgimê Muşî ra ya, dimayê ke zewicya şî dewa Niftîkî ya Gimgimî de bi ca bî. Aysele seba wendişê tutan mecbur mende ke bi keyeyê mêrdeyê xo dir verê xo bido qeza. Aysele wina qalê rewşa xo kena: "Seba wendişê tutan, ma şî Gimgim. Ma keyeyêk de 23 kes bî. Tutê vistewrîye mi zî zaf qij bî. Mi ewnîyayîne tutanê aye ra zî. Emrê mi qij bi. Dimayê ke tutê ma pîl bî ma zî ameyî Gimgim.”

 

‘Verê cuye zehmet bî’

 

Aysele dîyar kerd ke cuya verê zaf zehmet bî, la nika wina nîya û wina qal kerd: "Nika awe esta, makîneyê cilan, ê firaqan esto. Verê ma cilan bi dest şûtêne. Ma dewe de bi ramiş dir eleqedar bîne. La nika cuye zaf vurya ya."

 

‘Bi pesdewarî mi debara keyeyî kerd'

 

Aysele dewam de wina vat: "Wexto ke ma ameyî qeza, ma çîyêk xo dir nêard. Ma tena bi valîzêke ameyî qeza. Wexto ke ma Gimgim de keyeyêk de bi ca bî, ne paca û ne zî berî bî û ma ber û pacayan bi naylon pada. Pereyê ma çinbi. Her yew cayêk de xebityayîne û bi keda xo ma keyeyêk viraşt. Dima ra mi tay heywanî girewtî. Mi bi pesdewarî debara keyeyî kerdêne. Sewbîna mi nêwaştêne fek cuya dewe ra vera bidî."

 

‘Têkiliyê verê tewr baş bî'

 

Aysele bale ant serê têkilîyê dewe û wina vat: "Verê bawerîya merdiman yewbînan rê bî. Nika kes bi kesî bawer nêkeno. Verê kes biameyîne keyeyê ma nanê xo pare kerdêne. La nika wina nîyo. Ez zaf vîrîye verî kena. Pêwa pêro zehmetîyan cuya dewe tewr baş bî."