MÛŞ - Yalova de berê 5 keyeyê elewijan ame nîşankerdene û cinîyê elewîyî derheqê babete de vatî, nîşankerdişê beran nîşaneyê qirkerdişî yo, nîşankerdişê beran tesaduf nîyo.

 

Elewîyê Tirkîya her wext benê hedef, cuya înan asayîş de nîya û ziwanê îqtîdarî zî her wext hêrişan rê zemîn amade keno. Îqtîdar çapemenî de cîyayîyan hedef gêno û nimûneyo tewr peyîn zî Yalowayî taxa Baglarbaşi bi nîşankerdişê berê 5 keyeyê elewijan o. Hema hema her cayê Tirkîya de asayîşê canê elewijan çin o û vatişê nîjadperestî elewiyan keno mîyanê endîşe. Cinîyê elewî yê ke Gimgimê Mûşî de ciwîyenê, Tuna Han û hemsereka HDPyî ya Gimgimî Ayten Firat rekasîyon vera rewşe dayî.

 

'Her wext teda û şîdet ameyo kerdene'

 

Aytene dîyar kerd ke tarîxê elewîyan de her wext bi şîdet û tedayan dir rî bi rî mendê û Elewîyan problemê xo mîyanê xo de çareser kerdê û vat: "Seba nê her wext teda elewîyan rê ame kerdene. Ma qij bî mabêne elewî û sunîyan de pêrodayîş estbi. Pêrodayîş zî seba nê sîstemî bi. O wext ma ardêne hemverê yewbînan. Ewro zî eynî çî esto. Seba nê zî Yalova de sîstem hîn çîyan ferz keno. Elewîyan tu wext sere nêtewênayo. Her wext însiyatîfê xo xebitnayê."

 

'No nîşaneyê qirkerdişî yo'

 

Aytene dewam de wina vat: "Wexto ke merdim qirkerdişan bido verê çiman, no nîşan dano ke elewî tu wext teslîm nêbenê. Sîstem wazeno elewîyan bipelçiqno. Seba nê tehdîdê padayîşê Keyeyê Cemî keno, berê înan nîşan keno. Eke hema berî bêrê nîşankerdiş, nê nîşaneyê qirkerdişêke yê. Çîyê ke ewro yenê kerdene, tesaduf nîyê. Rejîmê yew camêrdî vano wa her kes ma ra bo. Seba nê zî yewin çare têkoşîn o. Tena elewî ney, asayîşê canê tu kesî çin o."

 

'Heta no îqtîdar bibo do nê çî dewam bikerê'

 

Tuna Han zî dîyar kerd ke hukmat xêrcê xo, cîyayêko bîn nêwazeno û coka vatişê nîjadperestî zêde bîyê û vat: "Ma hemverê polîtîkayê îfşakerdişî tu wext sere nêtewêna. Sey cinî û sey dayîkêke wazena ganî no peynî bibo. No polîtîkayêko lêşin o. Ganî wina nêbo. Ganî tena Elewî ney heme kesî vera nê bêveng nêmanê û vengê xo berz bikerê. Eke bêvengî bibo, do nê çî wina dewam bikerê. Ganî her kes bizano ke heqê Elewîyan esto ke nê welatî de biciwîyê. Wa her kes fam bikero. Na babete de ganî her kes çîyêk bikero."