MUŞ - Gimgimê yê Mûşî de dewa Yemîşenî, Besra Ergîn û Nurcan Ergîn ke bi pesdewarî dir eleqedar benê, dîyar kerdî ke seba vayîya êmî, heywanî vêşan manenê û vat, sey verê qezencê înan zî çin o.

 

Seba krîzê ekonomî welatijî bi hawayêko cidî bi tesîr benê. Sewbîna sînorê vêşanî zî zêde beno. Yew wareyê ke krîz ra tesîr bîyo, pesdewarî yo. Gimgimê Mûşî de dewa Yemîşen de Besra Ergîn û Nurcan Ergîn êyê ke bi pesdewarî dir eleqedar benê, dîyar kerdî ke seba vayîye ma mecbûr manenê, heywananê xo biroşê.

 

'Yewin çimeyê debare pesdewarî yo'

 

Besra dîyar kerd ke bi serran o bi pesdewarî dir debare xo kenê û vat: "Ma serê sibayî rew wirzenê, axuran pak kenê. Dima ra şit ancenê û penîr û mast viraznenê. Ma debara xo bi nê berardişan kenê. Ma wisarî heywanan benê zozanan, çêrnenê. Ma demêk derg zozanan de manenê. Ma eşkenê vajê ke kes dewe de nêmaneno."

 

'Sey verî qezenc çin o'

 

Besra dewam de wina vat: "Herr wext zam yeno serê êmî. Êdî pesdewarî de sey verê qezenc çin o. Ma seba zaman, mecbûr manenê ke heywanan biroşê. Ma vera qezenckerdişî kewenê binê deynî. Dewe de ka merdimî eşkenê se bikerê? Xêrcê pesdewarî û ramitişî çîyêk bîn çin o. Krîz esto, kar çin o. Merdimî dewe de tena seba cuya xo dewam bikerê hewl danê. Pesdewarî de sey verê qezencê ci çin o."

 

'Ez 5 tutan dana wendiş'

 

Nurcane Ergîn zî dîyar kerd ke seba betalî mêrdeyê aye şiwanî keno û pereyê ci qezenc kerdo pê dewarî girewtê û debara xo wina kenê. Nurcane wina vat: "Zimistanî şit zêde çin o. Manga tena şit danê golikanê xo. Şitê ke ma gênê zî kenê penîr, mast. 5 tutê mi şinê mektebe. Ma lazimîyê înan eşkenê peyda bikerê. Sewbîna alternatîfêk bîn çin o. Êmê heywanan zî zêde vay bîyo. Çuwalêk êmî 150 TL yo. Di rojan dewam nêkeno. Ma nêzanê do na rewşe senî dewam bikero."