MERKEZÊ XEBERAN - Tepişteyê PKK û PAJKijî ke hîrê mengî yo vera tecrîdî grevê vêşanîye de yê vat: ''Heta azadîya Rayberîya ma têkoşînê ma do dewam bikero. Ma veng danê heme hetanê demokratîkan ke wa vera faşîzmî têkoşîn pîl bikerê û her kes wa bibo vengê xoverdayîşê ma..''

 

Denîz Kayayî bi nameyê tepişteyanê PKK û PAJKijan derheqê Komployê 15ê Sibate û grevê vêşanîye yê vera tecrîdî de eşkerayîye daye.

 

‘Hesabê klîkê îqtîdaran veng vejîya’

 

Eşkerayî de bale ancîya serê koployê mîyanneteweyî û ame vatene: “Şexsê Rayber Apoyî de ame waştene ke qikerdişê kurdan bêro kerdene. 15ê Sibate semedê şaranê bindestan û êyê ke têkoşînê azadîye û demokrasîyî danê sey roja sîyaye yeno destgirewtene. Ma sey tepişteyanê PKK û PAJKijan dormeyê Rayberîya xo sey çeberî genê û heta azadîya ey têkoşînî rê dewam kenê. Serrgêra 22. ya komployî de ma pê bawerê ke ma do çarçewa hemleya “Wextê ci yo: Ocalanî rê azadîye” de têkoşînî pîlêr bikerê û ser bikewê.

 

‘Vera planê qitkerdişî bi xoverdayîş ma do cewab bidê’

 

Dewamê eşkerayî de wina ame vatene: “Îqtîdaro faşîst ê AKP-MHPyî bi polîtîkayanê ke tira vano reform wazeno payra bimano. Seba ke peynîya înan bîya nizdî, her roje yew çî vejenê werte. Pê tetişpiş, destbendkerdiş, tehdîtanê qefilnayîşê partîye, çeteyan reyde hemkarîye, vetişê qanûnê goreyê xo û polîtîkayanê wînayênan zext û binpaykerdiş hedef girewto. Reyna janê Covid 19î zî sey firsendêk şuxulna. Pê medyaya şerê taybetî şarî xapîneno. Vera polîtîyanê îqtîdarî ke komelî fînayo mîyanê kaosî  êyê ke tradîsyonê têkoşînî ra yenê vindertişo bianor ramojna. Bêşik o ke îqtîdarî vera têkoşînê demokratîkî zaf hêzê vînî kerd ke hînî nêeşkeno payra bimano. Çoka plananê leyminan fîneno dewre.

 

Heta netîcegirewtişî çalakî ma do dewam bikerî

 

Ma sey tepişteyanê PKK û PAJKijan tecrîdê serê Rayber Apoyî qebul nêkenê. Coka ma 27ê teşrîna peyêne ra nata grevê vêşanîye de yê. Îqtîdaro faşîst seba ke têkoşînê ma bişikno keyeyanê ma ser o kayanê leyminan rayra beno. Keyeyanê ma zîyaret kenê û bi zûran wazenê bixapînê.Vanê pê zorî kewtî grev û medimanê ma ra vanê ke semedê qedînayîşê grevê wa veng bidê ma. Xora paşta ma meridmanê ma ra pît a. Sey vizêrî ewro zî ma zanê ke merdimê ma sereberz peyê ma de yê. Heta netîcegirewtişî ma do qerardar çalakîya xo rê dewam bikerê.

 

Ma ercê xo rê şarê xo rê wayîrê

 

Îqtîdar qanûnê înfazî yo ke menganê peyênan de vet, heme caardişê ci sîyasî û polîtîk ê. Pê nayî yeno waştene ke verê tehlîyekerdişê  heme tepişteyanê sîyasîyan bêro girewtene. Qanûno ke tira vanê veradayîşo bişert,  tepişteyan rê pîşmanîye dano ferzkerdene. Tepişteyê ke cezaya înan qedîyaya însafê îdareyê zîndanî rê yenê veradayene. Eke ê pîşman bê û heyet tesdîq bikero eşkenê vejîyê. Eke heyeto ke hetê îdareyê zîndanî ra yeno raameyene îkna mebo keso/a ke cezaya ci qedîyaya rixmê naye ganî 6 mengî vindero dima ra reyna vejîya verê nê heyetî. No qenun semedê tepişteyanê têgêrayîşê azadîye vejîyayo. Xora çete û tepişteyê edlîyî îqtîdarî reyde pê kenê û vejîyenê. Ma nê mulakatan qebul nêkenê. Ma do heta hela peyêne nasname, anor û vindertişê xo ra tewîz nêdo. Eke halo hole ke şima vanê sey şimabîyayîşo ma do çirey mebê. Ma ercanê xo rê girêdayeyê.

 

Bibê vengê ma

 

Ma tîya ra veng danê heme hetanê demokratîkan ke wa vera faşîzmî têkoşîn pîl bikerê û her kes wa bibo vengê xoverdayîşê ma.”