Sema Çaglak

 

AMED - Parlamentera HDPyî ya Êlihê Feleknas Uca, dîyar kerd ke hukmatê Bexda, Hewlêr û Enqerî amanc kenê ke fermanêko bîn bikerê û vat: "Ê ke Şengalî tena û bêpawitiş verdabî, reyke bîn wazenê serê Şengalî de fermanêko newe bi ca bîyarê. Seba nê ma zanê ke nê pêvînayîşî tesadufî nîyê. Seba qirkerdişê komelê êzidîyan o."

 

Polîtîkayê hempar yê Herêma Federalî ya Kurdistanî, Tirkîya û Iraqî seba welatijê ke herême de ciwîyenê, babetê sereyîn ê. Tewr peyîn zî serdayîşê Wezîrê Pawitişî Hûlûsî Akar û Serfermandar Yaşar Gulerî yê Bexda û Hewlêrî zî, mîyanê şarî de bi endîşeyêk pîl. Wargehê Multecîyan ê Şehîd Rustem Cûdî (Mexmûr) amborgo dewam keno, bê Şengalijan derheqê înan de pêkerdişêk ame îmzakerdiş, Wareyê Pawitişê Medya her roje bi hêrişan dir rî bi rî maneno û krîzê ekonomî her roje ke şino hîna kûr beno. Sîyaseto ke herême de yeno kerdene, rayîrê alozîyan akeno. Derheqê babete de parlementera Partîya Demokratîke ya Şaran (HDP) a Êlîhî Feleknas Uca ajansê ma rê qisey kerd.

 

‘Êzidî hemverê pêkerdişî vejîyayî wareyan'

 

Feleknase destpêkê qiseykerdişê xo de serê Pêkerdişê Şengalî de vinderte û vat: "No pêkerdiş ke esasê xo de destê dewleta tirkî û Amerîka ra bi ca ame. Vera nê xoverdayîşê Şengalî, bi 2 mengî zêdeyêr dewam keno girîng o. Şarê Şengalî hemverê nê pêkerdişî vejîyayî wareyan û derûdorê asayîşê xo de kom bî û cewabêk dayî nê pêkerdişî. Dimayê pêkerdişî, nika metodê cîya kenê û hewl danê ke hêriş bikerê. Dewleta Tirkî her wext Şengal hedef ramojna û no çîyêk newe nîyo."

 

'Wazenê fermanêk bîn bikerê'

 

Feleknase vat ke Şengal merkezêko stratejik o û vat: "Tena seba komelê êzidîyan ney, sewbîna sey şaristanîyêk seba merdimayî xeylêk netew û bawerîyê cîya serê na herre de ciwîyenê. Labelê na cuya hempar, hedef ameya girewtene. Rojawan û Şengalî de visnayîşêk yeno amanckerdene. Ê ke Şengalî ten aû bipawitiş verdabî wazenê ke serê Şengalî fermanêk newe bikerê. Ma zanê nê pêvînayîşî tesaduf nîyê. Seba qirkerdişê komelê êzidîjan o. Bêguman ma nê qerarî qebul nêkenê û reaksîyonê xo ramojnenê."

 

'Amanc ferzkerdişê koçberî yo'

 

Feleknase dewam de wina vat: "Derheqê êzidijan de qeraran gênê û înan ra pers nêkenê. Tena amancêke înan esto, koçkerdişê êzidijan o. Senîn ke no pêkerdiş nêame caardene, Wezîrê Pawitişî Hulusî Akar verê xo da Bexda û dima ra derbazê Hewlerî bî ke serê Şengalî de planan aver berê. Helbet ganî nêzdîbîyayîşê PDKyî hemverê nê planan pey goş nêkero kerdene. Ganî ma pers bikerê; çend rey hukmatê başûrê Kurdîstanî şîyo Şengal û çend rey bi îdarekardanê Şengalî dir pêvînayîş kerd ke wazenê serê komelê êzidijan ser o qerar bidê. Kesê ke nêşîyê komelê êzidî pêvînayîş nêkerdê, nêeşkenê derheqê êzidîjan de zî qerar bidê."

 

'Wazenê xerîteya Rojhelatê Mîyanên newe ra xêz bikerê'

 

Feleknase vat ke wazenê Lozaneko diyîn serê Şengalî de amanc bikerê û vat: "Wazenê ke pêkerdişê Lozanî serra 2023 de reyke bîn reyna bikerê. Senîn ke serra 1923 de bi pêkerdişê Lozanî dir Kurdistan kerdî 4 parçe, na rey zî wazenê newe ra xerîta xêz bikerê. Dewleta Tirkî wazena ke erdanê xo hîra bikera. Lozanêko diyîn serê Şengalî de yeno kerdene. Nê dir tena Şengal, Rojawan û başûrê Kurdîstanî ney, temamî ca gêno. Wazenê xeta Musilî xetêke wina viraznê. No zî tehlukeyêko pîl o. Seba ke wazenê konseptek cîya serê şarî de bi ca bîyarê."

 

‘Bi têkoşînî ma do kayanê înan veng vejê'

 

Feleknase tewr peyîn wina vat: "Temamê Rojhelatê Mîyanên de hêrişêk esto. Hemverê îradeyê şarê Rojhelatê Mîyanên plan û kayî yenê kerdene. Hemverê nê planan, xoverdayîşî şarî hîna zêde beno. Rêxitinbîyayîşê şar û cinîyan do bibo çareserîyêk seba ameyoxê Rojhelato Mîyanên. Coka lazim o ke ma pîya cuyêka azad û têkoşînê xo bihêz bikerê û no serkewtiş do heme kayê serê nê şarî de veng bikero."