WAN - Welatijê ke seba krîzê ekonomî her ke şino giran beno, bazaran ra destveng agêrenê û welatijan vat: "Ma berardişê erjan û nêbaş gênê. Rewşe qet baş nîya."

 

Seba krîzê ekonomî, welatijî bêzar bîyê, hem esnaf û hem zî welatijê ke şinê bazar gerrekerdox ê. Wan de esnafê ke hewteyî de her roje cayêk de yê, bendeyê muşterîyanê la çi heyf ke welatijê ke şinê bazaran zî tena tezgehan rê ewnîyenê.

 

'Ez bi 15 TL ameya bazar'

 

Saîme Guler dîyar kerd ke bi 15 TL ameya bazar û destveng bazar ra agêrêna û vat: "Her çî vay o. Kîloyêk firingî 7-8 TL yo. Ez ameya ke çîyêk bigîrê la çi heyf, îmkanê mi çin ê. Çimimê xeylêk çîyan d maneno. Yê tutanê ma zî wina. Ma nêeşkenê çîyêk bigîrê. Betalî esta. Mêrdeyê mi bixebityo dano, nêxebityo nêdano. Îmkanê ma zî çin ê. Kar bibo ez zî xebityena."

 

'Ez xidayê erjanan gêna'

 

Dîdeme Elmas zî dîyar kerd ke bazar ra xidanê tewr erjan gêna û vat: "Xidayê erjanî zî bêkalîte yê. Na rewşa ma qet baş nîya. Rewşa şarî xirab a. Ez bi 40-50 TL yena bazar la çîyêk nêeşkena bigîrî. Dewletêke ke wayîrê şarî vejîya çin a."

 

'Ma yew gênê ê bînan nêeşkenê bigîrê'

 

Saadete zî dîyar kerd ke meaşê teqawîtbîyayîşî qîmê çîyêk nêkeno û vat, menge ra hezar TL pereyê gaz û ceyranî dana û vat: "Ez bi 200 TL ameya bazar. Mi çend çîyê qijî girewtî. Ma bi omidêk ameyî la ma nêeşkenê bigîrê. Yew gênê ê bîn nêeşkenê bigîrê. Îmkanê karî welatê ma de çin o. Bi mîlyonan ciwan betal ê. Heme çî vay o."

 

Hasrete Yîgît zî mîlyonan ciwanê ke nêxebityenê ra ya, reaksîyonê xo wina ramojna: "Ez seba lazimî yena bazar la nêeşkena çîyêk bigîrî. Ez betal a. Seba ke nêxebityena, mecbûr a pîyê xo ra bigîrî. No mi dano zor. Pîyê mi tewr tay 50 TL dano mi. Wexto ke ez xebityena, lazimîyê xo ez gêna. Heme çî vay o. Ganî fîyetî bikewê."