WAN - Prosesê pandemî de seba qedexeyan xeylêk kesî mecbûr mendî ke dikanê xo bigîrê. Yew nînan ra zî cinîya bi nameyê Hîba Sarisaç a. Hîba nê prosesî de seruvenê xo yê viraştiş sey hobî kerdêne, açarna Atolyeya Cil û Belgan ê Nazenîn.

 

Seba pandemî xeylêk kesî dikanê xo mecbûr mendî padayî. Wan de cinîya bi nameyê Hîba Sarisaç kafeya xo ya 7 serrî bi xebitnayîne, seba sînorkerdişê pandemî pada û şî keyeyê xo. La meraqêk aye qijîtî ameyîne û cil û belgê kan goreyê xo viraştêne û xemilnayîne. Dima ra nê cil û belgan roniştoxê taxe ke wayîrê lazimîyê, vila kerdêne. Dimayê ke nê viraştişê aye eleqe dî, atolya Nazenîn akerd. Hîba proses ajansê ma rê ercna.

 

'Mi cilê ke deştêne dayîne tutan ra'

 

Hîba wina vat: "Ez û birayê xo ma mezûn bî la tayînê ma nêame. 7 serrî yo ez sektorê karî de ya. 6 serrî yo karê xo kena, cafeya ma estbî. Ma şubeyê diyîn akerd. La seba pandemî ma pada. Serê nê de mi dest bi deştişê cilan kerd. Mi cilê ke deştêne dayîne tutanê taxe. Mi dayîne embaz û merdimanê xo. Cilê ke mi deştêne xeylêk ameyî heskerdiş. Nê ser mi atolye akerd."

 

Pêwa astengîyan fek ci ra vera nêda

 

Hîba dewam de wina vat: "Ez pûncan ra bigî heta şal, blûz û fistanan derznena. No welatî xeylêk kesî unîversîte qedênayê û betalî estê. Mi beşê komelnasî wend. La seba ekonomî mi kafe akerd. Pêwa heme astengîyê komelî mi karê xo kerd. Seba krîzî karê mi vindert. Seba pandemî ma mecbûr mendî kafeyê xo padê. Ma pereyê ke kom kerdibî ma nika xebitnenê. Yanî o yo ke esto, ma wina wenê. Mi pere xo rê tay kom kerdibi. Bi serrêke ma keye de yê, ameyîşê ma çin o. Seba nê ma pereyê ke kom kerdibi xebitnenê."

 

'Merdim bawer bikero eşkeno her çî bikero'

 

Hîba tewr peyîn wina vat: "Seba karêk newe sermayêk hewce bi. Mi pereyê ke dabi pêser, atolye akerd. Seba makîneyê mi bêrê ez di mengî bende menda. Nika ma newe dest bi kar kerd. Merdim bawer bikero, eşkeno her çî bikero. Prosesê pandemî de seba dewlete paştdayîş nêda esnafan, dikan ameyî padayîş. Yanî keye de zî çîyêk destê ma de bimano, nêmend. Ez xo ra bawer kena ke ez no karî de serkewte bî. Ma di kesan dest bi nê karî kerd. Tena gerek merdim zerrî ra biwazo."