Medya Uren

 

MÊRDÎN - Parlamentera HDPyî Pero Dundar derheqê polîtîkayê ke Hêrêma Federal a Kurdistanî yenê kerdene dîyar kerd ke ganî seba pawitişê destkewtişê yewîye lazim o û vat: "Hemverê hêrişê Mexmûr û Şengalî, sewbîna hemverê tasfîyekerdişê kurdan ganî ma nêrê kayan. Sewbîna seba ke ma bibê, ganî ma yew bê."

 

Rojeve Herêma Federal a Kurdistanî îşxal kerda. Selahîyetdarê herême hewl danê ke xo krîzê asayîşî, ekonomî û sîyasî ra bixelisnê. Polîtîkayê ke herême de yenê kerdene, rayîrê alozîyê sîyasî akeno û asayîşê herême keno binê tehluke. Na rewşe bîyaye hetê welatijan ra nîna qebulkerdene. Parlamentera Partîya Demokratîke ya Şaran (HDP) ya Mêrdînî Pero Dundar, serê babetê sey ablûqakerdişê Wargehê Şehîd Rustem Cûdî (Mexmûr), pêkerdişê hukmatê Bexda û Hewlêrî yê derheqê Şengalî, hêrişê hawa yê hemverê herêman û lazimîyê yewîya kurdî vindarya û ercnayîşê xo ajansê ma rê qal kerd.

 

Peroye destpêkê qiseykerdişê xo de bale ant serê girîngîyê yewîye û wina vat: "Yewîye xercê komelî ya. Eke yewîyêk nêro awankerdene, komel nêeşkeno serê lingan de bimano. O komel mehkumê rijnayîşî beno. Ma sey şarê Rojhelatê Mîyanên çiqasî eynî ziwan û kulturî pare nêkerê zî yewîye girîng a, hela ke yewîye seba şarê Kurdî na bena mecbûr î. Seba ke ma bibê, ganî ma yew bê. Nika ma qalê hêrişê PDKyî kenê, ez nê sey ‘birakiştişî’ zî nêvînena. Seba ke teberê îradeyê şarî, hêzêk kurd hêrişê hêzêk ê bîn keno. Xêrcê waştişê temamê kurdan yewîya. Key ma fek berjewendîyê xo yê kesî vera da ma do nê rastî tewr zelal bivînê. Seba ke kurdî vînayê û zanê ke no şerî teber ra yeno tehlukeyîn o."

 

'Ma parçe nîyê, ma ameyê parçekerdiş'

 

Peroye vat, hêrişê înan qîm nêkeno na rey metodêk bîn ceribnenê û vat: "Her hatê Kurdistanî ra vera destkewtişê ma hêriş yenê kerdene. Pêwa hewildayîşî nêeşkenê ma çin bikerê. Nika wazenê hetê akonomî û sîyasî de kontrolê kurdan bikerê. Seba nê zî heme welatan têkilîyê xo viraştê. Çi heyf, ma hema zî kewenê xefikê nê kayan. Belê ma parçe nîyê, ma ameyê parçekerdiş. Ganî bi zanabîyayîş m anê kayan veng vejê."

 

'Nê hêrişan ra do kam serkewtiş bidest bikero'

 

Peroye dewam de wina vat: "Eke ma hêrişê ke başûrê Kurdistanî de qewimyenê, sey hêrişêk vera PKKyî bi erjnê, do şaş bo. Seke ma verê zî dîyar kerd, no bi amancê qirkerdişê pêro kurdan ser o yeno kerdene. Nimûneyê nê komployê mîyannetewî yê 15ê Sibate yo. Bi tepiştişê birêz Abdullah Ocalan dir tafsiyekerdişê kurdan kerdêne amanc. Komployê xo yê ke veng vejênê zî bi tecrîd û bi hêrişê mîyanxoyî dir danê dewamkerdiş. Ganî ma bifikrîyê gelo şerêk wina de kam do serkewtiş qezenc bikero? Dişminê ma ra zêdeyêr kes qezenc nêkeno. Ganî ma fersend nêdê dişminê xo. Nika ma destkewtişê pîlî kerdê bi dest. Nimûneyê sereyîn zî Rojawan o. Ûca de xoserîya xo awan kerdê. Bi nê wesîle heme dinya ma nas kena û statûyê ma tesdîq kenê. Ma do bi yewîye destkewtişê xo bipawê û tewr pîl bikerê."

 

'Hêrişê destkewtişê kurdan kenê'

 

Peroye dewamê qiseykerdişê xo de bale ant serê rewşa Mexmûrî û vat: "Mexmûrijî qetî sîstemo bîyaye qebul nêkerdê û hemverê îqtîdarê dewleta tirkî zî sere nêtewênayê. Înan çinbîyayîş ra bîyayîş awan kerd. Pêwa heme hêrişê Tirkîya cuyêka newe awan kenê û bi îdarekerdişê xoser xo rayîr benê. Bi 2 serrî yo ambargoyêk giran serê Mexmûrî de esto. Cuya înan rojane û komelî, perwerde, weşî û bi taybetî zî hetê ekonomî de ameyo astengkerdene. Heto bîn ra 2 kesî dimayê ke hetê pêşmergeyê PDKyî ra ameyî tepiştiş, dinyaya xo bedilnayî û 4 ciwanê ke seba mecbûr şîne kar qeza kerdî û dinyaya xo bedilnayî, berpirsiyarê nînan çi heyf PDK yo û rayîr ver bi hêrişê dewleta tirkî akeno."

 

'Ganî ma nêrê kayê înan'

 

Peroye tewr peyîn wina vat: "Êzidî 74 fermanan rê rî bi rî mendî. Dimayê nê fermanan ewro rastê hêrişê dewleta tirk û PDKyî yenê. Sewbîna hêrişê wareyê pawitişê medya bi eynî rengî yo. Dewlete hêrişê nasname, destkewtiş, cografya û yewîya ma kena. Ganî ma nêrê nê kayan. Ma bi omidê ke ganî bikewê nê ferqî û bi pêvînayîşan problemê bîyaye çareser bikerê. Ma seke siyasetmendarê kurdî, seke şarê kurdî vera nê hêrişan ê."