Hîkmet Tunç

 

WAN -  Ayten Yaşar ke hewl yeno dayene ke keyeyê aye bi ters û pelçiqnayîşî bikerê binê tecrîdî, dîyar kerdî ke ganî her kes vera tecrîdî vengê xo berz bikero.

 

Bi amancê binpaykerdişê heqan yê zîndanan peynî bê û tecrîdê serê Rayberê PKKyî Abdullah Ocalanî bêro wedaritene, grevê vêşanîye yê bêdem û bidor zîndananê Tirkîya de ame destpêkerdene û 73 rojî pey xo de verda. Teber de zî keyeyê tepişteyan û rayapêroyî çalakîyê tewir bi tewir bi ca anê. Wan ke teda û sereştişê polîsan rûtîn bîyo her roje welatijî yenê destbendkerdene. Keyeyê Ayten Yaşar zî yew nê keyeyan ra yo. Aytene vat, heme kesê keyeyî rê cipersayîş ameyo destpêkerdene û çîyê ke ciwîyaya qalî kerd.

 

Seba ke tewrê bernameyê 8ê Adare bî ameye destbendkerdene

 

Aytene vat ke 2017 de tewrê bernameyê 8ê Adare Roja cinîyê Dinya bîya û bi sebebê dovîz girewta ameya destbendkerdene û vat: "Verê mi de xeylêk kesî ameyî destbendkerdene. Polîsan vat çir aşima tewrê 8ê adare bîyê. 8ê Adara ke pêro dinya de yeno pîrozkerdene, seba cinîyê kurdî sebebê destbendkerdişî bi. Seba nê serrêke ez ameya muhakemekerdene. Dima ra qerarê bêtaqîbkerdişî ame dayene."

 

'Tutê mi travma cuya'

 

Aytene dîyar kerd ke hemverê adresê kuçeyê Surmelî yê Xaçortî yê Îpekyolê her wext polîsan sereştiş kerdo û her sereştişî de kesê keyeyî rê teda ameyo kerdene. Aytene wina vat: "Polîsan bi sebebê cîya sereştiş kerd. Lajê mi vat, 'bi solan mekewê zere' nê ser o lajê mi destbend kerdî. Cigêrayîş derheqê lajê mi de dayî destpêkerdene. Demêk derg şi edlîyeyê Wanî û ame. Lajê min o qij seba sereştişî bi şewe tersayîne. Bi qîrîn hewn ra rawiştêne. Hema zî na travma serê xo ra nêeşto."

 

Nuşteyê dêsan suc ame vînayene

 

Aytene vat ke grevê vêşanîye ke bi rayberîya hemsereka KCDyî Leyla Guven amebi destpêkerdene û 200 roj pey xo de verdabi, lajê aye serê dêsêke de 'tepişteyanê sîyasîyan rê azadî’ nuşto û seba nê lajê aye ameyo destbendkerdene û vat: "Netîceyê îxbarî de polîsan reyna eşt serê keyeyî û lajê mi destbend kerdî. Taxe de xeylêk keyeyî rastê sereştişî yenê. Amancê sereştişan zî pelçiqnayîş û tersnayîşî yo."

 

'Ganî her kes vengê xo berz bikero'

 

Aytene tewr peyîn wina vat: "Tepişteyî nika kewtê grev û tena sebebê nê oyo ke kurdî nêbenê yew û parçe parçe vindenê. Eke ma bibayîne yew, vera binpaykerdişan vengê ma berz bibayîne do tepişteyî zî nêkewtêne grev. Ê vera binpaykerdişan kewtê grev. La ma teber de nêeşkenê bibê vengê înan zî. Ganî kes nêterso û vengê xo berz bikero û têkoşîn bikero."