WAN - Leyla Aslan ke bi rotişê berardişê keda destan ekonomîya xo bi dest kena, dîyar kena ke ganî cinî serê linganê xo de vinderê û vat: "Cinîya ke ekonomîya xo bi dest bikera, hemverê şîdetê camêrdan sere nêdana ro."

 

Cinîya bi nameyê Leyla Aslan ke 28 serrî ya û Ebexê Wanî de ciwîyena, bale ant serê têkoşînê cinîyan û dîyar kerd ke zîhniyetê serdestî yê camêrdan ke cinîyan hepsê keyeyî keno, ancax bi têkoşînî eşkeno bêro şikitiş.

 

'Ez bi qerar bîya ke pereyê xo qezenc bikerî’

 

Leyla dîyar kerd ke herême de wareyê îstîhdamî yê cinîyan bi sînor o û seba nê xeylêk cinî berardişê kede yê destan viraznenê û roşenê. Leyla wina vat: "No karo alternatîf seba mi bi çimeyê debare. Ez bi qerara ke ekonomîya xo qezenc bikerî. Mi her wext waştêne ke ez pereyê xo qezenc bikerî. Mêrdeyê mi nêverdayîne ez bixebityî. La mi rayîrêke dî û pereyê xo qezenc kerd. Tîya berardişê wina yenê heskerdiş û xebitnayîşî. Ez nê patîkan viraznena. Xêrcê mi kes nêzano virazno. Ez serê sîparîşan viraznena."

 

'Heme çî zaf vay o'

 

Leyla dewam de wina vat: "Ez gacêke la bi 3 TL û nîm gêna, binê înan zî bi 4 TL û nîm gêna. Yanî bi pêroyî de beno 8 TL. Ez citayê ci bi 15 TL roşena. Hemverê keda mi kêmî yo. La îmkanê karî çin o. Heme çî vay o. Cinî seba nê wina debara xo kenê. Ganî cinî serê linganê xo de bimana. Nêzdîbîyayîşê, ‘cinî nêeşkena her karî bikera' şaş o. Merdim pereyê xo qezenc bikero zaf baş o. Ez mêrdeyê xo ra pere nêwazena. Ganî pêro cinî azad bê, nêrê hepskerdiş û bixebityê."

 

'Ganî ma cinî paştdayîş bidê yewbînan'

 

Leyla dîyar kerd ke cuye keye de derbaz nêbena û veng da pêro cinîyan ke azadîya xo bidest bikerê û vat, netîceyê têkoşînê cinîyan de xeylêk destkewtiş ameyî bidestkerdiş. Sewbîna Leyla veng da ke ganî cinî paştdayîş zî bidê yewbînan.