AMED - OHD û TUHAY-DERî raporê derheqê binpaykerdişê heqan yê zîndanan amade kerdo de eşkera kerd. Eşkerayî de dayîka laçigsipî Yesure Tufan wina qisey kerd: “Domanê ma verê mergî de yê. Ez veng dana heme rêxistinê sîvîl û yê Ewropa ke wa wayîrê domananê ma vejîyê.”

 

Şubeyê Komeleya Huqûqnasê seba Azadî (OHD) û Komeleya Hetkarîya ya Keyeyê Tepişteyan (TUAY-DER) derheqê raporê binpaykerdişê heqan yê zîndanan amade kerdê, awanîya Şubeyê OHDyê Amedî de eşkera kerdî. Endamê Meclîsê Dayîkê Aştîye, endam û îdarekarê Partîya Demokratîke ya Şaran (HDP) ê bajarî û merdimê tepişteyan tewrê eşkerayî bî. Rapor hetê îdarekarê OHDyî Avûkat Muhîttîn Mûgûçî ra ame wendene.

 

‘Muameleyêko bi kêfî yeno kerdene’

 

Muhîttînî dîyar kerd ke komîsyonê zîndanan û TUAY-DERî serdayîşê xeylêk zîndanan kerdê. Muhîttînî vat: “Seba covîd-19î xeylêk çalakîyê fizikî ameyê astengkerdene û hetê pakitî de xeylêk heqî ameyê binpaykerdene. Sewbîna seba cezayê dîsîplînî erşawitişê mektuban, kitab û heqê telefonî ameyo astengkerdene. Eynî wextî de kotayê cilan sey sebeb ameyê ramojnayîş û bi no hawa cilê xeylêk tepişteyan nêameyo dayîş. Yan zî muameleyêko bi kêfî ameyo kerdene û bi no hawa tecrîdê serê tepişteyan xo resnayo tecrîdêk bi metodêko bîn.”

 

Tespît û pêşnîyazî ameyî rêzkerdene

 

Muhîttînî dewamê qiseykerdişê xo de pêşnîyazan rêz kerd û vat: “Ganî tepişteyê nêweşî bi lez bêrî tedawîkerdene. Ganî mahremîyetê tepişteyan rê hurmet bêro nîşandayene. Ganî şert û mercê tepişteyan bêrî başkerdene û hetê pakîye hesas bêro têgêrayene. Ganî semedê astengkerdişê nêweşîya vîrusî tedbîrî bêrî girewtene. Xeylê înfazê tepişteyan ameyî veşênayene. Ganî fek nê caardişanê kêyfîyan ra bêro veradayene û goreyê huqûqî bêro têgêrayene.”

 

‘Domanê ma verê mergî de yî’

 

Badê wendişê raporî dayîka Yesure Tufane qisey kerd û aye zî wina vat: “Xeylê çîyê ke bêrê vatene estê, la êdî vatiş dejê ma sivik nêkeno. Ma hesretê domananê xo de yê. Ma rewşa domananê xo vera nêrakewenê. Domanê ma verê mergî de yî. Ez veng dana heme rêxistinanê sivîl yê ewropa ke wayîrê domananê ma bivejîyê. Zîndanî bi tepişteyanê nêweşan pirkerdeyê. Ma nêwazenê domanê ma bimirê. Wa çareserî bêro vînayene. Wexto ke domanê ma vêşan manenê, ma nêeşkenê ronişê sifre ser o. Êdî bes o, wa vengê ma bêro eşnawitene.”