ENQERE - Endama Meclîsê Cinîyan ê HDPyî Ozlem Gunduz, dîyar kerd ke kampanya ke partîya înan 8ê Sibate de dana destpêkerdene de bi esasê ‘seba cinîyan edalet' do hemverê qetilkerdiş, şîdet, tacîz, tecawuz, feqîrî cinî do têkoşîn bikerê.

 

Partîya Demokratîke ya Şaran (HDP) derheqê problemê Tirkîya de bi amancê pêşnîyazê çareserî bi komelî dir pare bikerê û rexneyan bigîrê 8ê Sibate de kampanya ‘Edelet’ danê destpêkerdene. Meclîsê Cinîyan ê HDPyî zî çarçewaya kampanya de munaqeşe kerdî û plansazî awan kerdî. Rojeva Meclîsê Cinîyan do qirkerdiş, tecrîd, tacîz, tecawuz, feqîrî û polîtîkayê tasfîyeyî estê.

 

Endama Îdarekara Heyetê Merkezî (MYK) û Meclîsê Cinîyan ê HDPyî Ozleme Gunduz derheqê kampanya de qisey kerd.

 

Ozleme dîyar kerd ke netîceyê munaqeşeyan de pêşnîyazê kampanya vejîya werte û wina vat: "Ma do 8ê Sibate de startê kampanya bidê. Gelo çira hewcedarî bi kampanyayêk wina bi? Îqtîdarê AKP-MHPyî hemverê heme hetê komelî bi taybetî hemverê cinî, karker, kedkar û muxalîfan hêrişan keno. Bi taybet prosesê pandemî de îqtîdar hêrişanê xo zêde kerd û krîzê ekonomî tewr giran bi. Bi pandemî dir şîdetê serê cinîyan zêde bi. Faşîzmêko mende esto. Hemverê nê zî ma do têkoşîn bikerê."

 

'Ma bernameyê xo zelal kerd'

 

Ozleme dewam de dîyar kerd ke kampanya do 8ê Sibate de bê destpêkerdene, dewamê kampana ke HDPyî 1ê Hezîrane de ya ‘Bernamê Têkoşînê Demokrasî’ yo û vat: “Hema hema her roje hîrê cinî yenê qetilkerdene û vera nê de sê şîdetê serê cinîyan zêde bîyo. Feqîrî û betalî zêde bîyo. Krîzê ekonomî zêde bîyo. Seba nê hewcedarî kampanya vejîya meydan. Sernameyê kampanya dîyar ê. Nînan ra yew zî tecrîd o. Yew ci ra qerarê DMMEyî derheqê Demîrtaş de yo, o bîn zî krîzê ekonomî, munaqeşeyê derheqê padayîşê HDP û şîdetê serê cinîyan o. Ma bernameyê çalakî zelal kerde.”

 

‘Sernameyê kampanya seba her kesî edalet o'

 

Ozleme dewam de wina vat: "Bêdadî, bêhuqûqî hema hema xo her wareyê komelî de xo dayo ramojnayîş. Seba nê zî ma hedef kenê ke xetêke têkoşînî yê hempar bi heme hetan ra awan bikerê. Hedefê ma oyo ke ma xo biresnê heme kesan vera na rewşe xeta xoverdayîş û têkoşînî awan bikerê. Ma sey meclîsê cinîyan zî munaqeşe kerd. Munaqeşeyê ma dewam kenê. Do serdayîşê ma dewam bikerê. La tecrîdêk giran esto. Bi tecrîdî dir şer û feqîrî esto. Vernîya ma de 8ê Adare esto. 1ê Adare de ma startê xebatan danê. Ma do vera qetilkerdişî, şîdetê serê cinîyan, hemverê binpaykerdişan, zîndanan de wareyan de bê. Pêro cinî polîtîkayê îqtîdarî ra nêrehet ê. Bi hawayêko sîstematîk cinî yenê qetilkerdene. Hemverê nê hêrişan, qetilkerdişê cinîyan ez eşkena vajî ke yewîyêke nuqtayê têkoşînî de esto."

 

Hewl danê ke cinîyan bitersnê'

 

Ozleme bale ant serê tepiştişê Leyla Guven û Ayşe Gokkan û vat: "Bi nê tepiştişan wazenê komelî bitersnê û têkoşîn bipelçqnê. Wazenê vernîya cinîyan bigîrê. Sebebê nê hêrişan zî oyo ke cinî hemverê faşîzmî bi qerar û îrade yê. Têkoşînê cinîyan ê hemverê faşîzmî ewro dest pênêkerdo û ewro do bi sînor nêmano. Bi serran o têkoşînê cinîyan esto, destkewtişê pîlî estê. Nê hêrişî do bi ma game peyser nêerzê."