ÎZMÎR - Merdima tepişte Sultan Yagmekan tecrîdê serê Îmralî şermezar kerd û vengdayîşê hîsgêrî tepişteyan kerd û vat: "Tecrîd nêwirzo ma do kîşte înan de têbigeyrê."

 

Merdima tepişte û Dayîka Aştîye Sultan Yagmekan dîyar kerd ke ganî vera grevê vêşanîye bêvengî çinbo û reaksîyon vera Komîteyê Vernîgirewtişê (CPT) yê Konseya Ewropayî (KE) ke nêşino Îmralî pêvînayîş nêkeno, ramojna. Sultane dîyar kerd ke waştişê tepişteyan oyo ke tecrîdê serê Rayberê PKKyî  Abdullah Ocalanî bêro wedaritiş û vat: "Tecrîd nêwirzo, ma do zî înan dir têkoşîn bikerê."

 

Sultane dîyar kerd ke lajê aye 13 serrî yo tepişte yo û vat: "Tutê ma semedo ke Kurd ê ameyê tepiştiş. Tecawuzkar, kiştox, yê ke tiryakî roşenê, teber de gêrenê û tutê ma zî semedo ke Kurdê ameyê tepiştiş. Homayî ma viraşto, ne Erdogan ne zî dewleta Tirkî. Ma sere vera înan nêtewênenê. Ziwanê ma çin hesibnenê. La ê sereyê ma tira zî bikerê, m afek vera nêdanê. Lajê mi serra vîyarte hîrê mengî grev de mend. Semedê zulmî kewtî grev. Gelo tutê înan çin ê, wijdanê înan çin o? Merdimayî nisîbê xo nêgirewto? Parlamenterê ma tepişte yê. Selahattîn Demîrtaş se kerdo? Tena têkoşînê heq û huqûqî dayo.

 

Ganî şîyayîşê Îmralî serbest bo

 

Sultane dîyar kerd ke pêwa CPT ameyo Tirkîya nêşîyo Îmrali û wina vat: "Çira nêşi? O zî însan nîyo?Çim û goşê xo padayê. Nêwazenê vengê ma bieşnawê. Tutê ma ûca de yê. Ma nêrehet ê. Ê zalim ê. Leyla Guven merg ra agêra. Nika reyna ameya tepiştiş. Nika reyna grev de yê. Waştişê înan bi ca nêro, do grev dewam bikero. Ganî pêvînayîşê Îmrali serbest bê. Heta tutê ma, heta Îmrali azad nêbo ma zî azad nîyê. Tecrîd nêwirzo, ma do zî înan dir têkoşîn bikerê."

 

Sultane bêvengîya welatijan zî rexne kerd û dîyar kerd ke eke vengê xo berz nêkerê do yew bi yew tutanê xo vinî bikerê û vengdayîşê yewîye û têkoşînî kerd.