AMED - Mehmet Çoreşoglu dewaya Sûrî ra 48 serrî ceza ci rê amebi birnayîş. Dayîka ey Kiymet Çoreşoglu dîyar kerd ke grevê vêşanîye xesarê pîl serê tepişteyan de verdeno û vat: "Gelo bendeyê mergê tutanê ma yê?"

 

Tepişteyê PKK û PAJKî bi amancê tecrîdê serê Rayberê PKKyî Abdullah Ocalan bêro wedaritiş û peynîya binpaykerdişê heqan yê zîndanan bîyarê, 27ê Teşrîna peyêne kewtê grevê vêşanîye. Grev roja 66ine de dewam keno û her roje paştdayîş seba grevan yeno kerdiş.

 

Mehmet Çoreşoglu 5 serrî yo tepişte yo. Di mengî zîndanê Tîpê D yê Amedî de mend û dima ra sewqê zîndanê Asayîşê Berzî yê Boluyî ame kerdene. Mehmet ke dewaya Sûrî ameyîne muhakemekerdene 48 serrî ceza ci rê ame birnayîş. Dayîka ey Kiymet Çoreşoglu dîyar kerd ke ganî veng bidê, vengê tepişteyan û vat, waştişê tepişteyan, waştişê heqdar ê.

 

'Ma her wext nêeşkenê şêrê pêvînayîş'

 

Kiymete dîyar kerd ke lajê aye bi birîndarî ameyo tepiştiş û vat: "Lajê mi nêame dermankerdiş û bi birîndarî erşawitî zîndan. Îdarekarê zîndanî dermankerdişê ey nêkerd. Lajê mi linga xo ra birîndar bibi. Hema zî dejê ci anceno. O zî qîm nêkerd, Amed ra surgunê Bolu kerdî. Destpêkê pandemî ra yo ez lajê xo nêvînena. Rewşa ma ya ekonomî dest nêdana. Seba nê ma her wext nêeşkenê şêrê."

 

'Gelo bendeyê mergê înan ê?'

 

Kiymete dewam de nê çî vatî: "2018 de bi rayberîya Leyla Guven zî grevî ameyî destpêkerdene û 6 mengî dewam kerd. Lajê mi zî grev de bi. Waştişê tepişteyan, waştişê heqdarî yê. Ganî cade bi ca bêrê. Tepişteyî dîyar kenê ke do fek waştişê xo ra vera nêdê. Lajê mi seba grevî roqelayê ci xesar girewt. Sewq kerdê nêweşxane la nêbenê nêweşxane. Nê grevî xesarê giran serê tutanê ma de verdenê. Eke waştiş bi ca nêrê do tepişteyî bikewê rojeyê mergî. Gelo bendeyê mergê tutanê ma yê?"

 

'Wa tutê ma azad bê'

 

Kiymete peynî de vat, yewin waştişê înan aştî ya û vat: "Ma dayîkê aştîye her wext aştî û azadî pawenê. Ganî hukmat game bierzo. Ma cuyêka bi rûmet wazenê. Ganî waştişê tutanê ma bi ca bêrê. Wa tutê ma azad biciwîyê. Xêrcê nê waştişê mi çin o."