AMED - Zeyneb Ozer ke waya ci Besîye Ozer, 25 serrî yo tepişteyî ya û heta nika 4 rey kewta çalakîya grevê vêşanîye wina vat: "Ganî tena keyeyê tepişteyan ney, lazim o ke her kes bibo vengê tepişteyan. Waştişê tepişteyan, waştişê pêro şarê kurdî yê."

 

Tepişteyê sîyasî yê ke dewaya PKK û PJAKî 27ê teşrîna peyêne 2020 de, bi amancê peynîkerdişê tecrîdê serê Rayberê PKKyî Abdullah Ocalan ke 21 serrî yo dewam keno û seba şermezarkerdişê binpaykerdişê heqan ke zîndanan de zêde bîyê, dest bi çalakîya grevê vêşanîye kerdî. êkirina mafan ku li girtîgehan de zêdebûne,Paştdayîşê seba grevî zî dewam kenê. Çarçewaya nê paştdayîşî de Mexmûr de zî vera tecrîdê Îmralî, bi rayberîya Meclisê Îştarî yê cinîyan 18ê Kanûna 2020 de çalakîya grevî dayî destpêkerdiş. Kampa Lavrîo ya Yunanîstanî de seba eynî waştişî grevê vêşanîye ame kerdiş û rojawanê kurdistanî de zî dem bi dem çalakîyê grevî û yê paştdayîşî zî bêmabên dewam kenê.

 

Hetêkê ra seba çalakîya grevê vêşanîye merdimê tepişteyan û keyeyê înan vengdayîşê paştdayîş û hîsgêrî kenê. Besîye Ozer ke Zîndanê Cinîyan ê Gebzeyî de tepişte ya, heta nika 4 rey kewta grevê vêşanîye. Waya Besîye, Zeyneb Ozer veng da selahîyetdaran ke waştişê tepişteyan bi ca bêrê.

 

'25 serrî yo tepişte ya'

 

Zeynebe dîyar kerd ke waya aye 25 serrî yo tepişte ya û wina vat: "Waya mi Amed de ameye tepiştiş û dima ra aye surgunê Zîndanê Midyadê Mêrdînî kerdî. Serra 2012 de tepişteyan seba şert û mercê zîndanan ke bêrê sererastkerdiş û zulmê ke înan rê yeno kerdiş, dest bi grevê vêşanîye kerdî. Waya mi o wext zî kewtibî grev. Uca ra zî ameyî surgunkerdiş û înan erşawitî zîndanê cinîyan ê Gebzeyî. Nika uca de manena. Waya mi tepiştişê xo de heta ewro 4 rey kewta grevê vêşanîye. Sewbîna serra 96 de kewtibî rojeyê mergî û dimayê 27 rojî înan wedarnabî nêweşxane."

 

'Eke tecrîd wedarnê do xeylêk çî bivuryê'

 

Zeynebe dewam de wina vat: "Tecrîd tena zîndanan de ney, teber de zî dewam keno û tu kes nêeşkeno fikr û fehmê xo bi rehetî vajo. Seba ke kes fikrê xo nêvajo, tedayêko zêde serê înan de esto. Eke tecrîd biqedîyo do semedê pêro şaran baş bo. Ma ewro rewşa Tirkîya vînenê ke her het ra krîzêko pîl esto. Bi tecrîdî dir krîz hîna kûr beno. Kes nêeşkeno medyaya dîjîtale bixebitno, her het ra astengî esto. Sîyasetêko xetimnaye esto. Tecrîd sere de Îmralî de dest pêkeno. Tepişteyî zanê ke gama ke Îmralî ser o tecrîd wirzo, ê do heqanê xo bigîrê xo dest. Eke tecrîd bêro peynîkerdiş, do xeylêk çî bivuryê."

 

'Ganî tu kes bêveng nêmano'

 

Zeynebe vat ke paştdayîşêko bingeyîn gerek keno û vat: "Nika hem welat de û hem zî teberê welatî de paştdayîşêko xurt esto. Paştdayîşê çalakî do hîna zêde bibo û xo bi resno pêro wareyan. Vera nê de ganî tena keyeyê tepişteyan ney, tu kes bêveng nêmano, lazim o ke pêro keye û rêxistinê sîvîl zî bikewê hewldayîş. Pêwa nê çî bêvengîyê îqtîdarî hemverê çalakîya grevê vêşanîye nîno qebûlkerdene. Wa goş bidê waştişê tepişteyan. Waştişê înan, waştişê şarê kurdî yê."