Sara Şêx Hesen

 

HELEB - Endama Kongreya Starî ya şaristanê Helebî Sîhame Bîlal, derheqê tepiştişê Hemsereka KCDyî Leyla Guven û hedefgirewtişê îradeyê cinîyan de ercnayîş kerd û vat: "Leyla seba ma sembolê xoverdayîş û têkoşînî ya. Tepiştişê Leyla qerarêk huqûqî nîyo. Bi tepiştişê Leyla dir wazenê, desteştişê serê îrade û azadîya cinîyan bikerê."

 

Dewleta tirkî tarîx de heta roja ma ya ewro hêrişê rêxistin û sîstemê cinîyan kena. Bi kerdişanê tewir bi tewir wazena îradeyê înan bişikno û înan heqê înan ra dûr bifîno. Hêrişanê xo de destpêk de cinîyê sîyasetmedar, rayber û zana kena amanc. 21ê Kanûna 2020 de Hemsereka Kongreya Komela Demokratîk (KCD) Leyla Guven esîr ameye girewtene û cezaya 22 serrî û 3 mengî ci rê ame birnayene. Vera nê qerarê bê huqûqî, seranserê dinya de cinîyan reaksîyon ramojna. Derheqê babete de Endama Kongreya Starî ya şaristanê Helebî Sîhame Bîlal ercnayîşê xo ma dir pare kerd.

 

'Leyla Guven wayîra tarîxêkê têkoşînî yê pîlî ya'

 

Sîhame destpêkê qiseykerdişê xo de dîyar kerd ke dewleta tirkî bi tepiştişê Leyla dir îradeyê cinîya azade keno amanc û wina vat: "Nê kerdişî û hêrişê dewleta tirkî yê ke derheqê cinîyan de yenê kerdene, ma şermezar kenê. Hêrişê dewleta tirkî yê serê sîstemê cinîyan de lawazbîyayîşê dewleta tirkî ya hemverê îradeyê cinîyan ramojneno. Leyla Guven cinîyêka wayîra tarîxêkê têkoşînî yê pîlî ya û bi nê têkoşînê xo mohrê xo tarîxê cinîyan rê daya piro. Seba şikinayîşê tecrîdê serê Rayber Apo demêko derg kewte grevê vêşanîye û pê dir resa amancê xo. Nika zî dewleta tirkî bi metodê bêhuqûqî wazena ke îradeyê cinîyan bişikno û şexsê cinîyê sey Leyla de, ma dewaya têkoşînî ra abigeyrêno. Cinîyî ça benê wa bibê ruh û amancê înan yew ê. Ma do seba azadîya Leyla Guven û heme tepişteyan mîyanê çalakîyan de bê."

 

'Leyla temsîlkara xoverdayîş û têkoşînê heme cinîyan kena'

 

Sîhame dîyar kerd ke Leyla Guven temsîlkarîyê pêro cinîyan kena û wina vat: "Hêzê îqtîdarî qetî serwedaritişê cinîyan qebûl nêkenê, seba nê her wext wazenê îradeyê înan bişiknê û sere bi înan bidê tewênayîş. Leyla, temsîlkara xoverdayîş û tekoşînê pêro cinîyan kena. Dişmin nêeşkeno cinîyê kurdan qir bikero, seba ke ewro cinî fikrê xo de azad ê. Ma sereyê xo sîstemê ke wazenê bîyayîşê ma çin bikerê, nêtewenenê. Sebebê dewleta tirkî yê tepiştişê Leyla Guven huqûqî nîyo. Lazim o, na babete de rêxistinê merdimayî reaksîyon ramojnê."