WAN - Cinîya bi nameyê Kudret Botan Wan de terzîyî kena û cinîya bi nameyê Sema Savci zî Agirî de eynî karî kena. Her di cinî her çiqas şaristanê cîya de eynî karî bikerê zî, seba krîzî ameyî sewîyeya ke nêeşkenê bixebityê. Cinîyan dîyar kerd ke seba krîzê ekonomî ke prosesê vîrusî tewr giran bîyo, nêeşkenê êdî karê xo bikerê û vatî: "Verê berê ma nêameyîne padayîş. Nika zî anêbenê."

 

Krîzê ekonomî ke verê vîrusî rî dabi, bi vîrusî dir hîna giran bi. Nê prosesî de bi seyan esnafan dikan pada û nîmeyê esnafê ke dikanê xo padayî cinî bî. Cinîyê ke seba deynî kîra,  ceyran û gaz nêeşkenê dikanê xo abikerê, di rey têkoşînê cuye danê. Cinîya bi nameyê Kudret Botan taxa Xaçortî ya Îpekyol yê Wanî de cuyena û uca de terzîxaneyê aye esto. Sema Savci zî Panosê Agirî de cuyena û aye zî terzîyî kena.

 

'Kumaşo 35 TL bi 65 TL'

 

Kudrete dîyar kerd ke bi kedêke pîl dikanê xo akerdo û vat verê akerdişê dikanî, keyeyê xo de deştiş kerdo û vat: "Muşterîyê mi, mi ra razî bî. Seba nê mi xo rê dikanêk kîra kerd. Mi dikanê xo di serrî akerd. Goreyê mi ferqê cinî û camêrdan çin o. Her kes eşkeno bixebitîyo. Ganî ma hewceyê kesî nêbê. Camêrdî senî cuya xo dewam kenê, ganî cinî zî wina dewam bikerê. Verê vîrusî mi kumaşê xo Sîlopîyê Şirnexî ra ardêne. Kumaşo serra vîyarte mi bi 35 TL girewtêne, nika bîyo 65 TL. Verê veyvan de cinî ameyîne fistan deştêne. La seba vîrusî veyvî betal bî. Mi vayê vistanî nêvurna. Seba ke pere merdiman dir çin o. La rewşe zehmet a. Menga vîyarte de mi bi zor kîrayê dikanî da."

 

'Kesêk nîno dikan'

 

Cinîya bi nameyê Sema Savci zî Panosê Agrî de ciwîyena û seba ke mêrdeyê aye kar nêkeno, dest bi karê deştişî kerda û vat: "Ez cil û belgê adetî derznena. La seba krîz ez karê destan zî kena. Ma debara xo bi dikan kenê. Krîz her ke şino giran beno. 13 serrî yo deştiş kena û emsar rewşe zaf xirab a. Verê pandemî veyvî çinbî. Veyvî seba ceyîzî ameyîne, cil û belgan ameyîne. Verê berê ma nêameyîne padayîş, nika zî ma nêeşkenê abikerê. Pêwa nê ma cuya xo dewam kenê."