Sara Şêx Hesen

 

HELEB - Cinîyê ke taxa Şêx Meqsûdî ya şaristanê Helebî de reaksîyon vera tecrîdê serê Rayberê PKKyî Abdullah Ocalanî de yeno kerdene de ramojnayî û vatî: "O ke hêz û bawerî dayo ma ke ma sere vera îşxalkerdoxan û faşîzmî wedarnê Rayber Apo yo. Rayber Apo waştişê têduştî û edaletî kerdêne, seba têduştî û demokrasî mîyanê têkoşînî de yo. Seba edalet û demokrasî ganî tecrîd peynî bibo."

 

Rayberê PKKyî Abdullah Ocalan 15ê Sibata serra 1999 de bi komployê mîyanneteweyî esîr ame girewtiş û teslîmê dewleta tirkî ame kerdene. Bi 21 serrî yo Rayberê PKKyî Abdullah Ocalan Îmralî de xo ver dano û no demêko derg o ke tecrîdêko giran serê ci de yeno kerdene. Hemverê tecrîdê girankerde şarê Kurdî û dostê înan mîyanê çalakîyan de yê û her waştişê heq û azadîya Abdullah Ocalan kenê. Vera tecrîdî her wext reaksîyon û nêrazîbîyayîş hetê şarî ra bi rayîrê çalakîyan yenê dayîş. Derheqê babete de cinîyê şaristanê Helebî ercnayîş kerdî.

 

'Seba edalet û demokrasî ganî tecrîd peynî bibo'

 

Şîraze Silêman reaksîyon vera tecrîdo girankerde da û vat: "Komployê ke serê Rayber Apo yenê kerdene, bi şîdet şermezar kenê. Ma zanê ke dişminê ma yo yewin dewleta tirk a, la wexto ke babete bena kurd û heqê înan pêro dewletî bêveng manenê û no zî yeno a mana ke paştî danê dewleta tirkî. Dewleta tirkî rayberê ma ra çi wazena? Eke Rayber Apo azad nêbo, ma qetî azad nêbenê û ma nêeşkenê vajê ke ma azad ê. Rayber Apo waştişê têduştî û edaletî kerdêne, seba têduştî û demokrasî mîyanê têkoşînî de yo. Seba edalet û demokrasî ganî tecrîd peynî bibo. Ma fehmê Raber Apo cuya xo de esas gênê, bi xêrê fikrê azad ma bî wayîrê statu û bîyayîşî."

 

'Ganî seba azadîya Rayber Apo ma serê lingan de bê'

 

Peynîya qiseykerdişê xo de Şîraze veng da dewletê mîyanneteweyî ke vera tecrîdî de vindertişêk cidî ramojnê û vat: "Êdî bes o, pêro rêxistin û dewletê ke qaşo vengdayîşê heqê merdiman kenê. Ganî bi wezîfeyê xo yê merdimayî wirzê û peynîya tecrîdî bîyarê. Ma cinî ganî seba azadîya Rayber Apo her wext serê lingan de bê, heta ke azad bikerê."

 

'Rayber Apo seba pêro şaran têkoşîn keno'

 

Ewaş Mihemed zî bale ant serê binpaykerdişê heqan û zordarî ke zereyê zindanî de yenê kerdene û wina vat: "Rayber Apo tena seba şarê kurdî ney, seba pêo şaran vengdayîşê azadî û xelaskerdişê heme şarê bindestan keno. Zîndanê dewleta tirkî de heqê tepişteyan çin o, kerdişê bêhuqûqî înan rê yeno kerdene. Ma Rayberê xo ra qut nêbenê, ma do bi pêro metodan seba azadîya ey xebatanê xo xurt bikerê."