WAN - Şaîre û nuştoxe Mulkîye Tekîn dîyar kerd ke camêrdo bi nameyê Mehmet Salîh Akdenîz ke serrêke yo serê hesabê çapemenîya komelî de ci tacîz keno, nîno tepiştiş û vat, tehdîdê merdişî keno. Mulkîye ke di rey şî qerekole û gerre kerd vat, pêro murcatê ci bênetîce mendê.

 

Seranserê welatî de hedîseyê tacîz, tecawuzî zêde bî. Problemê ke hetê îqtîdarî ra nînê çareserkerdiş, cinî êdî serê çapemenîya komelî de teşhîr kenê. Nuştoxe Mulkiye Tekîn serra vîyarte de serê çapemenîya komelî de rastê tacîzê Mehmet Salîh Akdenîz ameye û pêwa ke bi desan rey gerre kerd zî gumanbar nêameyo tepiştiş û tacîzî dewam kenê.

 

Nuştox û şaîre Mulkiye Tekîn derheqê tacîzê ke rî bi rî ameya ajansê ma rê qal kerd.

 

'Cinîyê bînî zî tacîz kerdo'

 

Mulkîye derheqê babete de vat ke serê hesabê cîya yê medyaya dîjîtal de gumanbar aye tacîz keno, tut û embazanê ci nêrehet keno û vat: "Serê medyaya dîjîtal de waştişê qebulkerdişî erşawit, mi zî qebûl nêkerd. Dima ra embazanê mi vat, camêrdêko bi nameyê Mehmet Salîh Aydenîz perso to kerdo û mi zî vat, çîyêk mevajê. La ey her wext mi nêrehet kerd. Mi derheqê ey de cigêrayîş kerd. Netîce de musaya ke ey cinîyî bînî zî tacîz kerdo. Vernê de mi zêde çîyêk nêkerd. La heta ke xo resna telefonê mi, êdî mi numaraya xo vurna. Sewbîna şîyo cayê karê mi û embazanê mi ra xeylêk çî vato."

 

'Pêwa ke mi teşhîr kerd zî nêame tepiştiş'

 

Mulkîye dewam de dîyar kerd ke xo resnayo keyeyê gumanbar û keyeyî vat ke gerre bikere û vat: "Keyeyî vat,  ‘bi problem o, ma nêzanayîne do hende aver şêro.' Menga Adara vîyarte de ez şîya qerekole. Seba keyeyê min ke Iraq de yo vîdeoyê nêbaş erşawitibi. Vîdeoyan de fotoshop kerdo û sereyê mi xebitnayo. Mi qerekole ra netîceyêke nêgirewt û mi serê medyaya dîjîtale de teşhîr kerd. Ez hewteyê vîyarte de ez reyna şîya qerekolê Artemîtî. Ez fam nêkena gelo no kes çira nîno tepiştiş. Ez nêzana xo û tutanê xo senî bipawî. Sînyalê telefonî ra zî eşkeno bêro tepiştiş. Bi 9 mengî yo nê tacîzî dewam kenê. Birayê mêrdeyê mi hedîse pê musa û vato ke çîyêko wina bibo ez o bikişî. Siba, disbayî ez bêrî kiştiş do kam nê hesabî bido. Kiştişê cinîyan seba cipersayîşêk baş nîno kerdene, netîce nêbeno. Mi tehdîdê kiştişî girewt. La pêwa nê çareserîyêk çin o."