AMED - Hemsereka Şubeyê hûmara 2 ya Egîtîm Senî ya Amedî Zuhal Sezer derheqê bêtêduştîyê perwerdeyî de yenê ciwîyayîş û sewbîna babetêke hîn dersî hetê îdareyê mektebî de yenê weçînayîş ser o ercnayîş kerd û vat: "Tutê ma texteyê ceribnayîşî nîyê. Wa goreyê xo qeraran nêdê."

 

Yew wareyêko tewr zêde pandemî ra bi tesîr bi, wareyê perwerdeyî bi. Senîn ke Tirkîya de vîrus vejîya meydan, wareyê perwerdeyî de xeylêk vurnayîş ame kerdene. Bi vurnayîşê ke vera ke vernîye vîrusî padê, verpayê ci tewr zêde vernî akerdî û bêtêduştî zêde bî. Nînan ra yew zî perwerdeyê onlîne bi û çi heyf, îmkanê pêro wendekaran çinbi ke biresê perwerde.

 

Hemsereka Şubeyê hûmara 2yine Egîtîm Senî ya Amedî Zuhal Sezer derheqê bêtêduştî de û babeta ke hîn dersê hetê îdareyê mektebî de yenê weçînayîş de ercnayîş kerd.

 

'Tutê ma texteyê ceribnayîşî nîyê'

 

Zuhale dîyar kerd ke mektebî nêzdîyê mengêke akerde mendê û nê prosesî de vîrus tewr zêde vila bîyo û hukmatî mekteban bi ‘înşallah’ û ‘maşellah’ akerd. Zuhale wina vat: "Ewro wazeno bi eynî metodî reyna mekteba abikero. Hukmat vano ke ‘ma do mekteban abikerê û tablo rê biewnê.' No zî yeno o mana do hedîse zêde bibê. Na babete de ma vanê ke ne wendekarî, ne keye û ne zî mamoste ne texteyê ceribnayîşî yê."

 

'Ganî tedbîr bêrê girewtiş'

 

Zuhale dewam de vat ke bîyê şahid, seba mamosteyan maske, dezenfektan û hûmara kadroya mamosteyan nêameyê çareserkerdene û vat: "Çi heyf, hukmat nika zî bi planêk cîya nîno. Hedefê înan oyo ke sewîya bi sewîya mekteba abikerê. Ma zî wazenê perwerdeyê ri bû ri bêro destpêkerdiş. La ganî tedbîrî bêrê girewtiş."

 

'Eke hukmat nêeşkeno xo biresno wendekaran no kêmîyêk pîl o'

 

Zuhale dîyar kerd ke eke welatêko sosyal, azad û demokrat biciwîyê; wareyê perwerdeyî de ferzkerdiş nêeşkeno bêro kerdene û no zî demo ameyox de serê wendekaran de travmayan virazno û xo kifş nêkerê û vat: "Ganî dersê weçînayîşî wendekar û keyeyan rê bêrê verdayîş. Her cayê Tirkîya de wendekarê ke perwerdeyê onlîne nêeşkenê feyde bigîrê estê. Wendekarê mexdur estê.  Amed de 500 hezar wendekaran ra 200 hezar hebî wendekarî yew sanîyeke EBA ra feyde nêgirewtê. Seranserê Tirkîya de 18 mîlyonî wendekarî estê û tena 6 mîlyonî EBA ra feyde gênê. Eke ewro hukmat neşko xo biresno wendekaran no kêmîyêke pîl o. Dewan de problemê înternetî esto. Ganî berpirsyarîyê nê şarî û wendekaran rê nêro barkerdiş. Ganî dewlete xizmet bido. Bêguman ma zî perwerdeyê rî bi rî wazenê. La ganî tedbîrî bêrê girewtiş. Sewbîna zî do cuya tutan bikewo rîsk. Heqê kesî çin o wina bikero."