Sema Çaglak

 

AMED - Hanîfî Kaçar ke bi 17 serrî yo zîndan de yo û cinîya Hanîfî, Edalet Kaçar dîyar kerd ke wedaritişê tecrîdî waştişê heme kesan o û wina vat: "Wa êdî no zulm serê zîndanan de biqedo. Gama ke no tecrdê serê zîndanan û serê serokatî werte ra wedariyo, o wext aştîyêke mende do awan bo."

 

27ê teşrîna peyêne 2020 de tepişteyê sîyasî yê zîndanê Tirkîya û herême vera tecrîdê serê Rayberê PKKyî Abdullah Ocalan û seba şermezarkerdişê binpaykerdişê heqê tepişteyan dest bi grevê vêşanîye yê bêdem û bidor kerdî. Derheqê babete de merdimê tepişteyan vengdayîşê hîsgêrî kenê. Sewbîna hemverê tepişteyan de her roja ke derbaz beno, tewr zêde beno.

 

Tepişteyê PKKyî Hanîfî Kaçar (56) ke cezaya muebetî ci rê ameyo birnayene, bi 17 serrî yo zîndan de yo. Roja ke ameyo tepiştiş, heta nika xeylêk rey ameyo surgunkerdiş. Hanîfî nika zî zîndanê Manîsa de Tîpa Tyî de maneno û tepişteyêko nêweş o. Cinîya Hanîfî, Adalet Kaçar dîyar kerd ke roja ke ameyo tepiştiş, heta ewro xeylêk teda û îşkence dir rî bi rî mendo.

 

‘15 rojan hucre de mendibi'

 

Adalete destpêkê qiseykerdişê xo de dîyar kerd ke mêrdeyê aye seba îşkenceyê ke ci rê ameyê kerdene, hem hetê psîkolojîk de hem hetê fîzîkî de xeylêk nêweşî ey dir peyda bîyê û vat: "36 serrî ceza dayî mêrdeyê mi. Xeylêk îşkence bi ci ame kerdene, sewîyeya îşkenceyanê xo wina zêde kerdî ke reyke ez şîya pêvînayîşê ey. La mi ey nas nêkerd. 15 rojî hucre de mendibi. Ma çend rey waştişname şawit ke tedawîya ci bêro kerdene labelê pêwa waştiş û vengdayîşê ma nêame tedawîkerdiş û verpayê ci îşkence û teda ser de dewam kerd."

 

'Ma weşîya ci ra bi endîşeyîn ê'

 

Adalete dîyar kerd ke mêrdeyê aye êdî nêeşkeno şert û mercê zîndanî de îdare bikero û vat: "Hanîfî tepiştayîşê xo de heta nika xeylêlk rey kewto grevê vêşanîye zî la serrê peyîn de seba ke nêweşîyê ey ci rê giran ame, nêeşka bikewo grev. Rewşa ey de başbîyayîş çin o, çiqas şino hîna xirab beno. Emrê ey pîl o û êdî nêeşkeno uca de mîyanê îşkence de biciwîyo. Ma seba weşîye ci bi endîşeyîn ê. Xêrcê tedawîkerdişî sewbîna çareyêk çin o. Mêrdeyê mi bi çend serrî yo keyeyê xo ra dûrî yo. Gama ke ma şinê pêvînayîşê ey, xeylêk zehmetîyan dir zî ri bî rî manenê. Surgunê şaristanê ke dûrîyê kenê û coka reyan îmkanê ma qîm nêkenê ma şêrê pêvînayîş."

 

'Wedaritişê tecrîdî waştişê ma yo'

 

Adalete tewr peyîn wina vat: "Ma heme wazenê ke tecrîd wirzo. Ewro seba ke tecrîd serê heme zîndanan ra wirzo, ganî ma dest bidê destê yewbînan. Wa pêro keyeyî tepişteyan rê wayîr vejîyê. Dest û lingê tepişteyan uca de girêdaye yo labelê eke ma ewro înan rê nêbê cewab, o wext ê do senî biciwîyê. Ganî ewro çi lazim bo, seba tepişteyan ganî ma bikerê. Tena ez ney ganî pêro tepişteyî paştdayîş bidê. Ma seba nê çalakîyan bikerê. Gama ke no tecrîd serê tepişteyan û serê serokatî werte wedarya, o wext aştîyêke mende awa bena."