Ronîda Hacî

 

HESEKÊ - Hemsereka Kantonê Hesekî Semer Abd El-Ilah derheqê qetilkerdişê Hemsereka Meclîsê bajaroka Til Şayirî yê qezaya Deşîşayî ya Kantonê Hesekî Sada Feysel El-Hermas û Temsîlkara ci Hind Letîf El-Xidêr wina vat: "Bi qetilkerdişê cinîyan têduştîyê şaran û îradeyê cinîyan hedef yeno girewtene. Ma do vera zîhnîyetê qetil keno têkoşîn kenê."

 

Hemsereka Meclîsê bajarokê Til Şayirî ya qezaya Deşîşayî ya Kantonê Hesekî Sada Feysel El-Hermas û Temsîlkarê do Hind Letîf El-Xidêr hetê DAÎŞî ra bi rengêk wehşet ameyî remnayene û qetilkerdiş. Derheqê na babete de Hemsereka Kantonê Hesekî Semer Abd El-Ilah ercnayîş kerd.

 

'Ma do mîras û keda cinîyan wayîr vejîyê'

 

Semere derheqê babete de wina vat: "Şorişê Rojawanê Kurdistanî de cinîyî kurdî rayber bî, seba azadîya temamê cinîyan wayîrê rolêke çalak bi. Cinîyê pêkameyê erebî dimayê ke hetê şerwanê QSDyî ra ameyî xelisnayîş û azadîya xo bi dest kerd, xeta xoverdayîşê weçînayîşî û xo bi rêxistin kerdî. Ewro hedefgirewtişê Hemsereka Meclîsê Bajarokê Til Şayirî Sada Feysel El-Hermas û Temsîlkarê do Hind Letîf El-Xidêr ke vengdayîşê têduştîyê şaran kerdêne û seba bi rêxistinkerdişê cinîyê erebî xebate kenê, yeno manaya hedefgirewtişê projeyê Netewê Demokratîkî. Şexsê cinîyan de wazenê ke derbeyêke do proje ro bidê. Berdêlê nê çi beno wa bibo ma do mîras û keda cinîyan heta roja ewro pawitişî wayîr vejîyê."

 

'Ma do hemverê zîhnîyetê qetil keno têkoşîn dewam bikero'

 

Semere bale ant serê dewamkerdişê têkoşînê cinîyan û wina vat: "Cinî beşdarê heme wareyê xebate bî, rolêke çalak komelî de kay kerdî, vera zîhnîyetê îqtîdarî û zîhniyetê pederşahî têkoşîn kerdî. Labelê pêwa nê xoverdayîş û têkoşînê ke seranserê dinya de veng dayo, hema zî cinî yenê kiştiş, remnayîş, şîdet û heme tewirê hêrişan înan rê yenê kerdene. Qirkerdişşê Parîsî, hedefgirewtişê Maya Eqîde, Hevrîn Xelef, Zehra Berkel hêrişê serê keda cinîyan o. Zîhnîyetê pederşahî bi rengêk wehşet cinîyan qetil keno. Herdi cinîyê rayber awankerdişê şexsîyetê cinîyê ereb de wayîrê rol û mîsyon bî û wezîfeyê xo hta peynî bi ca ardî. Ma sersaxî keyeyê înan rê wazenê û ma do xebata înan biresnê sere. Bi qetilkerdişî cinîyê têduştîyê şaran û îradeyê cinîyan hedef yenê girewtene. Ma do hemverê zîhnîyeto ke qetil keno têkoşîn dewam bikero."