Gulîstan Azak

 

AMED - Temsîlkara Hemsereka Pêroyî ya Komîsyonê Kede ya HDPyî Şazîye Kose, dîyar kerd ke tewr zêde cinî krîzê ekonomî ra tesîr benê û vengdayîşê têkoşînê cinîyan kerd.

 

Krîzê ekonomî, krîzê vîrusî, betalî giran kerd û ekonomîya keyeyan her ke şina xirab bena. Pêwa vengdayîşê rêxistinan, îqtîdar çim û goşê xo padano û zam serê zamî de yeno kerdene. Betalî û feqîrî bena zêde û seba nê polîtîkayan zî kedkarê ke mîyanê deynî de întîxar kenê.

 

Partîya Demokratîke ya Şaran (HDP) rojê vîyarte de seba problemê wareyê kar û kede de rojê vîyarte de çarçewaya 'pêvînayîşê kar û xida' de Amed de şi serdayîşê karkeran. Heyetê HDPyî hedef keno ke şaristan bi şaristan bigeyro û karker û kedkaran zîyaret bikero.

 

Temsîlkara Hemsereka Pêroyî ya Komîsyona Kede Şazîye Koseke heyetî de ca gêna, derheqê rojeva kar û kede de ercnayîş kerd.

 

'Perdeyê serê zûran rawiştî'

 

Şazîye dîyar kerd ke şarê dinya bi serran o bi problemê kapîtalîst dir yenê rî bi rî û vat: "Krîzê ekonomî ke ameyêne cuyayîş, bi pandemî dir cuya karkeran ser o tesîrêk negatîf kerd. Bi pandemî dir zûrê înan vejîyayî werte û rastî xo ramojna. Seba krîzê ke ameyî ferzkediş, şar rî bi rî ame verdayîş. Îqtîdar însanan terkê mergî kerd. Ma sey HDPyijan vat ke xêrcê berardişê xizmet û malê ferzkerde, ganî berardişî bêrê vindarnayîş. Caardişê destûrê bi pere û ameyoxê heme xebatkaran bikewo binê asayîşî. La îqtîdar verpayê ci, pakêtê ke paştdayîş danê sermaye vetî. Tu par nêdayî karker û kedkaran.”

 

'Betalîyê cinîyan sewîyeya tewr berz de yo'

 

Şazîye vat tewr zêde cinî krîz ra tesîr bîyê û wina dewam kerd: "Cinî sey hêzê karî yê erjan yena vînayîş. Sewbîna êyê ke vernê de kar ra vejênê cinî yê. Bi nêzelalbîyayîşê saetê karî dir baro giran kewt serê milê cinîyan. Seba nê ma xebatanê xo de girîngî danê cinîyan û ma do vera binpaykerdişê keda cinîyan têkoşîn berz bikerê.

 

'Ma çîyê ke şar ciwîyeno baş fam kenê'

 

Şazîye dewam de wina vat: "Ma seke HDPyî şarî ra cîya nîyê, dûr nîyê. Ma şar bi xo yê.  Seba nê ma înan baş fam kenê. Ma pêro çî şarî dir kenê. Ma 'pêvînayîşê kar û xida plan kerd.' Startê ci ma Amed de da. Seba ke betalî uca de zêde bî. Ma do demê ameyox de kampanyayêke bidê destpêkerdiş. Ma seke îqtîdar nêvanê, 'ma çi bidê şima, pereyê ma çin o.' Ma zanê ke îqtîdar pereyo ke xerc keno o pere şino ça. Ma wazenê ke pere cayêko baş de bêro xerckerdiş. Seba nê ma do bi karker, kedkar, cinî û ciwanan dir têkoşîn bikerê."

 

'Şarê  Tirkîya binê tecrîdî de yo'

 

Şazîye tewr peyîn vat ke şarê Tirkîya binê tecrîdî de yo û vat: "Yê ke tewr zêde yenê tecrîdkerdiş zî karker ê. Bêkar yenê verdayîş û paştdayîş nîno dayene. Hedefê ma oyo ke problemê pêroyî  seke sername bigîrê rojeva xo, nîqaş bikerê û biresê netîce."