ÎZMÎR - Dayîka tepişteya bi nameyê Rozerîn Kalkana ke tewrê grevê vêşanîye bîye, Şerîfe Kalkan dîyar kerd ke tecrîd serê pêro komelî de yo û bale ant serê binpaykerdişê heqan yê zîndanan.

 

Bi amancê wedaritişê tecrîdê serê Rayberê PKKyî Abdullah Ocalan û peynîkerdişê binpaykerdişê zîndanan, tepişteyê sîyasî 27ê teşrîna peyêne de dest bi grevê vêşanîye yo bêdem-bidor kerdî. Tepişteya bi nameyê Rozerîn Kalkan zîndanê Cinîyan ê Şakranî de verê zî tewrê grevî bibî. Dayîka aye Şerîfe Kalkan dîyar kerd ke polîtîkayê tecrîdî tesîr serê pêro heme komelê şarê Tirkîya keno û bale ant serê binpaykerdişê heqan yê zîndanan.

 

Her kes binê tecrîdî de yo

 

Şerîfe dîyar kerd ke kênaya aye Rozerîn 4 serrî yo tepişte ya û vat: "Wexto ke kênaya mi berdî Îzmîr, ma hetê ekonomî û şîyayîşî de zehmetî ancenê. Kênaya mi grev de ya. Rewşa aye baş nîya. Zîndan zaf serd o. Kalorîferan nêfînenê ta. Waştişê tepişteyan, wedaritişê tecrîdî yo. No tecrîd tena zîndanan de ney, her ca de yo. Her keye de tecrîd esto. Ma nêeşkenê çîyêk vajê ma hem ayenê tepiştene. Ma tecrîd qebûl nêkenê."

 

'Tutê ma suc nêkerdê ke poşman bê'

 

Şerîfe tewr peyîn dîyar kerd ke zîndanan de mektuban, kitaban û koveran nêdanê û wina qedêna: "Bi qanûno peynî ke ameyo vatene, poşmanî tepişteyan rê ferz kenê. Ma tutê ma suc nêkerdê ke poşman bibê. Ma poşman nîyê. 50 serrî ceza zî bidê ma, ma poşman nîyê. Ma heta peynî verê tutanê xo de yê. Qanûn vetê, tena seba Kurdan vetê."