AMED - Îdarekara şubeyê OHDyî yê Amedî Seda Zengîn dîyar kerd ke waştişê tepişteyan huqûqî yê û wina vat: "Ganî azadî û heq esas bêrê girewtene û wina nêzdîyê probleman bibê, waştişî bêrê ercnayîş û bêrê çareserkerdiş.”

 

Bi amancaê wedaritişê tecrîdê serê Rayberê PKKyî Abdullah Ocalan û bi peynîkerdişê binpaykerdişê zîndanan, tepişteyê sîyasî 27ê teşrîna peyêne de dest bi grevê vêşanîye bêdem-bidor kerdî. Koma 12ine roja 57ine de çalakî dewam kena. Şubeyê Komeleya Huqûqnasê seba Azadî (OHD) avûkate Seda Zengîn dîyar kerd ke ganî waştişê tepişetyan bi ca bêrê eke nêbê do netîceyê negatîf vejîyê werte.

 

'Do rayîr ver bi netîceyê negatîf abikero'

 

Seda dîyar kerd ke beno ke netîceyêk negatîf vejîyo werte û vat: "Dem bi dem grevê vêşanîye virazyayî û tesîrê ci zaf serê hetê komelî de bi. Hemsereka KCDyî Leyla Guven 2018 de hemverê tecrîdî grev da destpêkerdiş. Nika reyna bi amancê wedaritişê tecrîdî 27ê teşrîna peyêne 2020 de zîndanan de grev ame destpêkerdene. Na çarçewaya de tepişteyan dîyar kerd ke vera tecrîdî û binpaykerdişê heqan dest bi grev kerdê."

 

'Ganî wezaretê dade bikewo tevger'

 

Seda dewam de wina vat: "Tepişteyan rê şert û mercê tecrîdî yeno ferzkerdene. Na rewşe serê tepişteyan û keyeyan de tesîr viraşto. Tirkîya her wext binpaykerdişê heqan yena rojeve. Seba wareyê padayeyê, her wext sey wareyê serdestî ameyê vînayene û na çarçewa de binpaykerdişê pîl yê giran ameyê ciwîyayîş. Bi OHAL û pandemî dir zî binpaykerdiş giran bîyo."

 

'Lazimî bi ca nînê'

 

Seda dewam de wina qal kerd: "Binpaykerdişî zîndanan de dewam kenê. Ma bi xêrê muvekîl û keyeyan tespît kerd. Odaya ke yew tepişte maneno, gardîyan kewenê zere û cigêrayîş kenê. Hacetê pakitî tay danê. Nimûne seba pakitî yew çekpas û firçe yeno dayene û lavabo zî ci de. Prosesê pandemî de xeylêk surgunî yenê kerdene. Sewbîna wextê surgunî de cigêrayîşê viran yeno ferzkerdene."

 

‘Înfazî yenê veşnayîş'

 

Seda vat, werdê zîndanan tay o, baş nîyo û vat: "Kantînan de heme çî bi sînor o. Yê ke estê zî vay roşenê. Koxuşan de kamera ameyê bi ca kerdene. Demê peyîn de babetêka bîn bale ancena cezaya dîsîplînî. Tepişteyê ke tay mendo înfazê înan biqedo, hewl yeno dayîş ke înfazê înan bêro veşnayîş."

 

'Wa waştişê înan bêro çareserkerdene'

 

Seda tewr peyîn qiseykerdişê xo de wina vat: "Rewşa tecrîdî cuya tepişteyan kena tehluke. Sey verê waştişê tepişteyan huqûqî yo. Ganî selahîyetdarî waştişê înan bigîrê verê çiman û bikoyê tevger. Ma veng danê wezareta dade, sazgehê heqê merdiman û huqûqê yê mîyanneteweyî û neteweyî kenê ke bikewê tevger."