Medya Uren

 

MÊRDÎN - Cuya Narince sey bi hezaran cinîyê kurdî mîyanê têkoşn de derbaz bîyo. Mêrdeyê aye tepişte yo û lajê aye zî demê qedexê Nisêbînî de şîyo rehm. Seba Narince çîyo tewr girîng oyo ke serê lingan de bimano û vat: "Gama ke cinî biwazo eşkena vera her tewir tedayan vindero."

 

Pêwa her tewir tedayan cinî reyna metodêk vînena û serê lingan de vindena. Hetêk ra tedayê dewlete, hetêk ra tedayê cuye û hetêk ra zî tedayî komelî seba cinîyan bîyo sebebê têkoşînî. Seba Narinc Beyreta 45 serrî zî wina bi. Hemverê her tewir tedayan û dej û xeman her wext serê lingan de menda. Narince Nisebînê Mêrdînî de ciwîyena û ajansê ma rê qalê cuye xo kerde.

 

Narince dimayê ke zewicyena, demêko kilm de mêrdeyê aye yeno tepiştiş û 36 serrî ceza yeno dayîş. Mêrdeyê aye 28 serrî yo zîndan de yo. Narince hem seba lajê xo û hem zî seba mêrdeyê xo yê tepişteyî xebityena. Narince dem demî seba karkerîya mewsîmî zî verê xo dana metrepolê Tirkîya.

 

Lajê Narince prosesê qedexeyê tebervejîyayîşê teberî yê Nisêbînî de netîceyê hêrişan de şino rehm. Eynî wextî de zî keyeyê Narince yeno rijnayîş. Cuya aye destpêk ra heta ewro bi têkoşînî derbaz beno. Narince êdî bi tena sereyê xo manena û bi serran dir nêweşîyê cîya cîya aye dir peyda benê û cuye hîna ci rê zehmet bena. Narince êdî nêeşkena debara xo bikero û seba nê metodêk bîn gêrena.

 

'Wexto ke cinî biwazo eşkena her çî bikero'

 

Narince qiseykerdişê xo de bale ant serê têkoşînê cinîyan û vat: "Cuya mi her wext bi têkoşîn derbaz bî. Eke cinî biwazê eşkenê her çî bikerê. Seba ke cinî bi hêz ê. Bi taybetî nê demê peyînan de karê ke mi kerdêne, asan nêbî la mi kerdêne. Nê çî hêz dayîne mi û ez pê kêfweş bîne. Bi serran mi karê mewsîmî û karê ramitişî kerdêne. La nika seba ke ez nêweşa, nêeşkena bikerî. Ez nika seba debara xo kefî, şutik, papik û secadeyan viraznena."

 

'Her kes seba krîzî perîşan bîyo'

 

Narince, dîyar kerd her serra ke derbaz bena problemê cîya vejênê werte û wina vat: "Nika Tirkîya de krîzê ekonomî esto. Her kes pê perîşan bîyo. Her kes kewto mîyanê endîşeyan. Êdî ez zî nêeşkena debara xo bikera û hetkarî bida mêrdeyê xo û pere zîndan rê bierşawî. Keyeyê mi hetkarî keno la heta key. Çîyê ke ez viraznena zî baş nînê rotiş. Pêwa hende mi dejî antî, nika zî bi krîzê ekonomî dir têkoşîn kena. Na rewşêka zaf xirab a."