SÊRT - Çalakîya grevê vêşanîye ya k etepişteyan dabî destpêkerdiş, dewam kena. Merdimê tepişteyan veng dayî ke waştişî bêrê qebulkerdiş û vatî: "Gelo do no zulm heta key dewam bikero? Waştişê tutanê ma waştişê ma yê û ganî bêrê qebulkerdiş."

 

Bi amancê wedaritişê tecrîdê serê Rayberê PKKyî Abdullah Ocalan û protestokerdişê binpaykerdişê heqan ê zîndanan 27ê teşrîna peyêne de tepişteyan dest bi grevê vêşanîye kerdî. Grev roja 55ine de dewam keno û heta nika bi seyan tepişteyî tewrê çalakîye bî. Hukmat û çapemenîya hetgêr grevan ramojnenê.

 

Her çiqas grevo ke tepişteyan dayo destpêkerdiş çapemenî de nîno ramojnayîş zî grev bi îrade û hêzêk pîl dewam keno. Merdimê tepişteyan dîyar kerdî ke grev bi îradeyêk pîl dewam keno û vatî pêwa ke hukmat bêveng maneno zî do çalakî demêk nêzdî de bireso amancê xo.

 

'Ma nêwazenê tutê ma bimirê'

 

Dayîka tepişteyî bi nameyê Leyla Teymura ke zîndanê Tarsusî de manena û çar serrî yo tepişte ya, Gulîstan Teymur dîyar kerd ke kênaya aye par nê pêrar 4 mengî û nîm grev de menda û vat grevê nika de zî amancê aye esto û vat: "Ganî waştişî bi ca bêrê. Na dinya qîmê pêrûne kena. Ma zî wazenê tutê ma sey ê bînan bi hizûr û kêfweş biciwîyê. Her kes wayîrê heqî yo. Kulturê aîdê înan esto. La çir aê heqî nêdanê Kurdan. Tutê ma vera nêheqîyan kewtî grev. Wa waştişê înan bi ca bîyarê."

 

'Wa êdî dayîkî nêbermê'

 

Gulîstane vat ke ê êdî nêwazenê dayîkî bibermê û vat: "Ganî vera nêheqîyê ke zîndanan de yenê ciwîyayîş heyetêk bêro awankerdene û waştişê tepişteyan bireso şarî. Ma dayîkê kurdî bi serran o bermenê. Wa êdî dayîkî nêbermê. Ma yewîye wazenê. Ma razîyê ke çadire de biciwîyê la wa aştî û azadî bêro. Tena kênaya mi ney, nika bi seyan kesî grev de yê. De ma vajê çi."

 

'Ezbi kênaya xo serberz a'

 

Dayîka bi nameyê Abdulrahîm û Mele Îbrahîm Aşkara, Kudret Aşkara zî dîyar kerdî ke waştişê tepişteyan zaf girîng ê û vat, kênaya ci vera bêhuqûqîyan tewrê HPGyijan bîya û di birayê ci zî vindîbîyaye yê. Kudrete wina vat: "Kênaya mi Rewşan Aşkara (Sema Koçer) vera nê bêhuqûqîyê ke birayê ci ameyê kerdene verê xo da ko û dima ra şehîd bî. Kênaya mi nika her cayê dinya de yena vîrardiş. Wexto ke kênaya mi şî, çar lajê mi tepişteyeyî bî. Roja kênaya mi şehîd kewte lajêke mi tehlîye bi. Ez bi kênaya xo serberz a. Tutê mi par nê pêrar kewtî grev. Ez çiqas şîne zîndan, tutê mi roj bi roj everê çimê mi de helyayîne."

 

'Sey mi bi hezaran kesî estê'

 

Kurdrete dîyar kerd ke aye zulmê ke şarê Kurdî rê ameyo kerdene qetî xo vîr ra nêkena û vat: "Semedê pandemî her roje anonsî yenê kerdene. Gelo do rewşa tepişteyan senîn bo. Heta ke yew dilopêk gonî zî damaranê mi de bimano, ez fek têkoşînê xo ra vera nêdana. Ez her wext hemverê bêhuqûqîyan têkoşîn bikerî. Bila êdî aştî û hizûr bêro no welatî. Gelo do zulm heta key dewam bikero. Sey mi bi hezaran kesî estê. No dejê ke mi anto, ez qetî xo vîr ra nêkena."