Hesna Mihemed

 

ŞEHBA - Dayîka pakrewan Baran, Selwa Şêxo ke roniştoxê Efrînî ya, dîyar kerd ke aye do wayîrê têkoşînê tutê xo vejîyo û vat: "Waştişê Baranî o bi ke pawitişê herra xo bikero. Ma do waştişê tutanê xo yê pawitişê herre rê wayîr vejîyê."

 

Dayîîka Selwa Şêxo ke bi emr 50 serrî ya, dewa Qûtî ya qezaya Bilbilî ya Efrînî ra ya. Selwaya ke nika Kampa Berxwedanî de ciwîyena, lajê aye Xoverdayîşê Şêx Meqsûdî de şi rehm. Selwa dîyar kerd ke aye her wext seba lajê xo lûrnena û vat, do têkoşînê lajê xo dewam bikera.

 

'Ma do waştişê tutanê xo yê pawitişê herrî rê wayîr vejîyê'

 

Selwa destpêk de qalê lajê xo yê pakrewan Baran kerd û wina vat: "Baran tutîyê xo de xeylêk jîyatî bi û hetê derûdorê xo ra ameyîne heskerdiş. Keye de hetkarîya birayê xo kerdêne û nêwaştêne ke merdimêk ci ra bidejo. Tena waştişê Baranî o bi ke seba dewaya şarê Kurdî şer bikero û pawitişê herra xo bikero. Ma do zî sey înan wayîrê herra xo vejîyê. Baran hemverê hêrişê dişminî xeylêk xo ver da, sewbîna Xoverdayîşê Kobanî de ca girewt, heta ke Kobanî dest dişminî ra xelas bî. Dima ra derbazê mîyanê Xoverdayîşê Şêx Meqsûdî ya Helebî bi û waşt ke uca de zî hemverê hêrişê wehşî pawitişê şarê xo bikero. Xoverdayîşê Şêx Meqsûdî de Baran resa sewîyeya şehadetî û bi şehadetê ey ez ser berz a."

 

'Mi her wext serê lajê xo de lûrna'

 

Selwa dewamê vatişê xo de bale ant serê merasîmê Baranî û uca de dest bi lûrnayîşî kerd û wina vat: "Bi merasîmê Baranî dir 14 pakrewanê bînî zî ameyî oxirkerdene. Lajê mi Goristanê Dewa Metînayî ya Şehîd Seydo de ame oxirkerdiş. Merasîm de mi dejê vindîkerdişê Baran û waştişê ci bi rayîrê lûrnayîşî ard ziwan. Bi oxirkerdişê Baranî heme demê cuya ey ameyî verê çimanê mi û mi ci rê lûrna. Ma dayîkî girêdayîşê ma bi kulturî dir esto û ma bi lûrnayîş dewamê kulturê xo anê. Ma dej û sanikanê xo bi rayîrê lûrnayîş û kilaman anê ziwan û kulturê xo gane verdenê. Omidê min o peyîn oyo ke gorê Baranê xo reyke bîn vernîya mergê xo bivînî."