COLEMÊRG - Cinîya bi nameyê Melek Îpek ke rastê îşkence ameye, goreyê pêkerdişê Stenbolî ganî paştdayîşê psîkolojîk bigirewtêne la vera ci ameye tepiştene. Her hetê Tirkîya ra reaksîyon vera nê ame ramojnayîş û endamê Meclîsê Cinîyan ê Geverî yê HDPyî zî dîyar kerdî ke çîyêk ameyo ciwîyayîş, pawitişê cewherî yo.

 

Qezaya Doşemealti ya Antalya de cinîya bi nameyê Meleke Îpek hemverê camêrdo bi nameyê Ramazan Îpek ke îşkence bi ci kerd, pawitişê  cewherî kerde û kişt. Meleke Îpek dimayê hedîse bi birîndarî ameye tepiştene. Endamê Meclîsê Cinîyan ê  Geverî yê HDPyî dîyar kerdî ke ganî Melek Îpek serbest bêra veradeyene û reaksîyon vera qerarê dadgehe dayî.

 

'Pawitişê cewherî nêkerdêne do biameyîne kiştiş'

 

Selcan Saygi dîyar kerd ke Melek Îpek roja ke zewicyaya hetê mêrdeyê xo ra rastê  şîdetî ameya û Selcane wina dewam kerd: "Meleke di rojan rastê îşkenceyê fîzîkî û cinsî ameya. Ma sey cinî û dayîkî çîyê ke ameyê sereyê aye baş fam kenê. Çîyo ke Meleke kerdo, pawitişê cewherî yo. Ma vanê no heq o. Eke aye xo nêpawitêne do bi ameyîne qetilkerdene."

 

'Çîyê ke ameyê sereyê aye asan nîyê'

 

Selcane dewamê qiseykerdişê xo de wina vat: "Destûrê Bingeyîn de zî no xopawitişê cewherî yo. Ganî nêameyîne tepiştene. Ganî aye û di tutê aye paştdayîşê psîkolojîkî bigîrê. Çîyê ke ameyê ciwîyayîş, seba aye û tutê aye asan nîyê. Seba ke Meleke nêmerde ganî nêro cezakerdene. Ma kîşte Meleke de yê û çîyo ke kerdo heqê xopawitişê cewherî yo."

 

'Xopawitişê  cewherî heqê sereyîn o'

 

Oznur Evîn zî derheqê babete de wina qisey kerd: "Bifikirîyê, nê çî hetê mêrdeyî ra yenê kerdene. Seba pawitişê cewherî yeno kerdene ceza kenê. Eke Meleke ey nêkiştêne, do ey camêrdî Meleke bikiştêne. Pawitişo cewherî heqê ma yo tewr sereyîn o. Ez veng dana pêro cinîyan. Ma mecbûr nîyê bi tersê kiştişî biciwîyê. Seba nê ganî ma têhet de bê û bibê pawitoxê heqanê yewbînan. Cezakerdişê Meleke, cezakerdişê pêro cinîyan o. Seba nê ganî serbest bêro veradayene."