WAN - Seba zamê ke yenê kerdene, welatijê Wanî her çiqas soba bi tehluke bê zî, verê xo dayî soba.

 

Welatijê ke hemverê krîzê ekonomî her ke şino giran beno, bêçare manenê. 2020 de hîn kesan xo meydanan de veşna û hîn kesan zî bi fatureyê cêbê xo de peynîya cuya xo ardî. Zamo ke peyser yeno kerdene, welatijan  keno mîyanê zehmetîyan. Xida, sebze û fatureyê awe, ceyran û gazî welatijan bêzar kerd. Wan de nê rojan de serdê zêde ra welatijan hemverê vayîye ceyran û gazî seke alternatîf verê xo dayî sobaya kolîyan.

 

Welatijê ke nê rojê zimistanî yê serdî de verê xo dayî sobayanê sey, ‘Turbo’ yenê binamekerdene, la seba vayîye înan hezar û 500 dest pêkena, na rey zî verê xo dayî sobayanê sacî. Welatijê ke şinê Sûka Soban uca de hîna sobayê erjanan vînenê.

 

Tena dewlemendî eşkenê gazê xo bixebitnê

 

Vayîye înan goreyê tewirê sobayê sacî vuryena û tewr erjan bi 150 TL û borîyêk ci 12 TL û tewr tay 5 borî bêrê girewtene. Pêwa pêro hacetan beno 350 TL. Altun Demîra ke bazarê soba kena wina vat: "Dewlemendî eşkenê gaz bixebitnê. Ma feqîrî nêeşkenê bixebitnê. Mi hezar û 500 TL da soba. Mi hacetê yê bînî zî tîya ra girewtê. Ez soba ra hes kena. Do tewr tay 10 serrî na soba ma îdare bikera. La çîyo tewr girîng kalîteyê komirî yo. Komirê ke dewlete dayo ma nêveşêno, bê kalîte yo. Sewbîna ma komir zî girewt."

 

Agêreno îşkenece

 

Welatijê ke sewbîna alternatîfê înan çin o, mecbûr ê soba bixebitnê la sobayan ra xeylê qeza yenê meydan. Welatijê ke bi taybet komiro ke yeno vilakerdene xebitnenê, xeylêk rey netîceyê gazê karbondîoksîtî de dinyaya xo bedilnenê û taybetî zî seba tutanê qijan xeylêk bi rîsk o, xeylêk rey veşênê. Lazimîyo tewr sereyîn yê germbîyayîşî, welatijan rê agêreno îşkence.