MERKEZÊ XEBERAN - Goreyê raporê  Weqfê Pawitişê Xoza ya Dinya, bêdarverdayîşê dinya her roja ke derbaz beno zêd ebeno. Tena 14 serrê peyîn wareyêk daristanî yê bi qasê Iraqî çin bîyo.

 

Goreyê raporê Weqfa Pawitişê Xozaya ya Dinya (WWF), talankerdişê wareyê  daristanî yê seba merdiman, dewam keno. Rapor de ame neqlkerdiş ke mabêne serrê 2004 û 2017 de 14 serrî wareyêk ci 43 milyon hektarî yo, daristanî çin bi. No zî yeno manaya ke bi qasî temamê herra Iraqî, wareyêk daristanî çin bi.

 

Dîrektorê Pêroyî yê WWFyî Vêronique Andrieux radyoyê Europe 1 dir qisey kerd û dîyar kerd ke, mîyanê 14 serrê peyîn de talankerdiş û wêrankerdişê daristanan 'sewîyeya alarmî' da bi. Goreyê dayeyê ke Vêronîque pare kerd, wareyê daristanî yê Amazon û Cerrado yê Başûrê Emerîkayî, wareyê  Kongo yê Efrîka, nîmgiravê Borneo û Sûmatra yê Başûrrojhelatê Asyayî û daristanê derûdorê Çemê Mekongê ke yê Çînî, Vîetnam û Taylandî ra derbaz beno, mîyanê tehlukeyêk pîl de yê.

 

Goreyê WFFyî, tehdîdo tewr pîl yê serê Amazonan û xeylêk wareyê daristanî yê dinya, karê ramitişî yê ke her serre zêde beno. Ê sereyîn zî berardişê soya yo ke seba pesdewarî yeno xebitnayene. Seba nê zî wareyê daristanî yenê çinkerdiş û ramitişî rê yenê amadekerdene.

 

Viraştişê rayîrî, binsazgehî, meslegsazîyê daristanî û karê ramitişî yê Efrîka çend sebebê bingeyîn yê talankerdişê daristanan o.

 

Goreyê Dîrektorê WWFyî eke peynîyê talankerdişê daristanan nêro, Covîd-19 do nêbo şûbeyê peynî yê dinya û do xeylêk şûbeyê bîn merdimî tehdîd bikerê