AMED - Çalakîya grevê vêşanîye yo ke vera tecrîdê serê Rayberê PKKyî Abdullah Ocalanî û binpaykerdişê heqanê tepişteyan dîya destpêkerdene roja 48ine de dewam kena. Hunermend Nuarîn û Denîz Demane dîyar kerdê ke waştişê tepişteyan xeylê muhîm o û nizdîbîyayîşê hukmatî yê vera grevê vêşanîye nîno qebulkerdene. Hunermendan vatî ke ê do bibî vengê tepişteyan.

 

Çalakîya grevê vêşanîye yê bêdem û bêagêrayîşî yo ke tepişteyanê sîyasîyan 27ê teşrîna peyêne de zîndananê Tirkîya û Vakurê Kurdîstanî de vera tecrîdkerdişê Rayberê PKKyî Abdullah Ocalanî û binpaykerdişê heqanê tepişteyan dabi destpêkerdene, roja 48ine de dewam kena. Grevê vêşanîye roj bir roje pîl beno û selahîyetdarî zî vera grevî de bêveng manenê. Sere de keyeyê tepişteyan, nuştox, sîyasetmedar, pawitoxê heq û hunermendî xpaştî danê grevê vêşanîye û wazenê ke waştişê tepişteyan bêrî caardene. Hunermend Nuarîn û Denîz Demane zî paştîya xo ardî ziwan ser û veng dayî ke wa lez waştişê tepişteyan bêrî qebulkerdene.

 

‘Ma do bibî vengê tepişteyan’

 

Nuarîne qiseykerdişê xo de bale ante sebebanê destpêkerdişê grevê vêşanîye ser o û va: “Faşîzm timî mehkumê vindîkerdişî yo. Tarîx de timî ê ke xover dayî qezenc kerdî. Vera xoverdayîşî de timî êrîşî zî dewam kerdî. Tepişteyî nika xovedayîşêk gird danê. Werikna ma teber de hîna zêde xover bidayêne û embazê ma yê tepişte nêkewtêne grev. Xoverdayîşê teberî zî bêşik gird ê, la nîno o mana ke tena no mird keno. Tepişteyî barêko gird girewtî milê xo ser. Semedo ke biresê amacanê xo xover danî. Ma do bibî vengê tepişteyan.”

 

'Ganî ma wayîrê têkoşînê xo vejîyê û pîl bikerê'

 

Nûarîne dîyar kerd ke nêwazenê zîndanan ra xeberêka xirab bigîrê û va: "Serrê vîyarte de hetê fîzîkî de texrîbat serê tepişteyan de kerdo û bi pandemî dir rîsk pîl bîyo. Prosesê grevê yê serra verê de xeylêk tepişteyan çalakîya fedayî kerdî. Ma nêwazenê zîndanan ra xeberanê xiraban bigîrê. Ganî ma wayîrê têkoşînê înan vejîyê. Wa zîndanan ra cenazeyî nêvejîyê. Ma pêro bibê vengê zîndanan û wa cenazeyî zîndanan ra nêvejîyê. Ma eşkenê teber de çalakîyê cîya cîya bikerê."

 

Denîz Deman zî dîyar kerd ke Kurdistan de xoverdayîşê zîndanan cayêk girîng gêno û vat, tepişteyan verê ra heta ewro bi vatişê, ‘teslîmîyet îxanet o, xoverdayîş azadî ano' xoverdayê û vat: "Binpaykerdişê ke ewro yenê kerdene, bêhuqûqî ra yenê kerdene. Hêrişê wehşî dewam kenê. Rayberê Kurdan tecrîd kenê, îradeyê Kurdan xesp kenê, qeyûman tayîn kenê, şarî îşkence kenê, sîyasetmedaran erzenê zîndanan. Cinî û tutan rê dest erzenê, tecawuz kenê. Feqîrî û kedkaran bi vêşanî terbîye kenê."

 

'Tepişteyî xo ver danê'

 

Denîze bale ant serê tecrîdî û vat: "Merkezo sereyîn yê tedayan zîndan ê û heto bîn ra zî Abdullah Ocalan bi serran o tepişte yo. Binpaykerdişê heqan yê zîndanan, resayo sewîyeya tewr berz. Tepişteyî vera binpaykerdişî û tecrîdî, kewtê grev. Tepişteyî reyke bîn xoverdayîşo tewr giran xo ver danê."

 

'Do faşîzm vinî bikero'

 

Denîze dewam de wina va: "Dewlete vera nê bêveng manena do biba hemkarê sucî. Demo bîn de grevê vêşanîye, rojeyê mergî û xoverdayîşê dayîkan, bi rejîmê yew kesî gam eda eştiş. Dimayê serran avûkatî şî Îmralî û sebebê ci pîlbîyayîşê têkoşînî bi. Do xoverdayoxî bi ser kewê û do faşîzm vinî bikero."

 

'Ganî hunermendî xoverdayîş rêxistin bikerê'

 

Denîze sewbîna dîyar kerd ke bi mîlyonan kesî Abdullah Ocalan sey rayber qebûl kenê û coka bi mîlyonan kesî yenê tecrîdkerdene û wina va: "Şexsê Abdullah Ocalanî de heme komel yeno tecrîdkerdene. Her wareyê cuye de no yeno vînayene. Krîzê ekonomî, feqîrî, problemê perwerde, wareyê weşîye de vindîkerdiş raste rast girêdayê tecrîdî û bêçaretî yo. Nê prosesî de bêguman problemo tewr sereyîn yê azadîye yo. Seba ganî nê xoverdayîşî de hunermendî xoverdayîşê komelî rêxistin bikerê. Sewbîna ganî cinî vera tecrîdî hîna zaf vengê xo berz bikerê."