COLEMÊRG - Hemsereka HDPyî ya Colemêrgî Sîpan Turan dîyar kerd ke Tirkîya de 2020an de bi şert û mercê pandemî dir kiştişê cinîyan zêde bîyo û Tirkîya de 10 serrê peyîn de seranserê dinya de kewto sewîyeya tewr peyîn yê azadî. Sîpane sewbîna dîyar kerd ke zîhnîyeto ke cinî hespê keyeyî kerd û sere pê da tewênayîş, kiştox zî awan kerd.

 

Tirkîya de seba vîrusê koronayî 2020 de şîdetê camêrd-dewlete hîna zêde bi û 2020 de tewr tay 332 cinî netîceyê şîdetê camêrdan ra dinyaya xo bedilnayî. Kiştoxê 42 cinîyan nêame vînayene û 290 cinî zî hetê kesê ke nêzdîyê xo; pî, bira, merdim, tut, embazan ra ameyî qetilkerdene. 110 cinîyan bi hawayêko guman dinyaya xo bedilna. Hemsereka HDPyî Colemêrgî Sîpan Turan vat, Tirkîya de semedê sînorkerdiş û tedbîrê vîrusî de xeylêk problemî zî vejîyayê werte.

 

'Saetê peyîn yê serre de cinîyan qetil kerdî'

 

Sîpane Turan dîyar kerd ke qetilkerdişê cinîya 2021 de dewam kerdo û her serre tewr tay 300 cinî yenê qetilkerdene. Goreyê dayeyê 2020î 323 cinî ameyê qetilkerdene û 110 zî bi guman merdê. Sîpane dîyar kerd ke roja peyîn yê 2020 de 4 cinî ameyê qetilkerdene û va: "Saetê vernê yê 2021 de cinîyêke merde ameye vînayene. Kiştiş û şîdetê serê cinîyan bi hawayêk cidî zêde bi. Prosesê pandemî zî xo dir xeylêk problem ard."

 

‘Kiştoxî awan kerdî'

 

Sîpane tewr peyîn wina va: "Goreyê heyetê fikrê Freedom Hause zî Tirkîya 10 serrê peyîn de welato tewr peyîn hetê azadî ra kewto Tirkîya yo. Zîhnîyetê cinî hespê keyeyî kerd û sere pê da tewênayîş, kiştox zî awan kerdî. Ma do her wext vera şîdet, tacîz û tecawuzî bibê vengê cinîyan. Omidê mi oyo ke serra 2021 şîdet dûr bo."