AMED - Xezale Polat ke lajê aye Kemal Polat, zîndan de çalakîya grevî de ca girewt wina va: "Heta ke tecrîd werte ra wedarnê, do nê çalakî dewam bikerê. Lajê mi vat, ma têkoşînê xo dewam kenê û ma ra vat, 'şima zî uca de bi têkoşîn wayîrê çalakîya ma vejîyê' û vengdayîşê hîsgêrî kerd."

 

Tepiştayê sîyasî yê PKK û PAJKyî, 27ê Teşrîna peyêne de bi amancê bi peynîkerdişê tecrîdê serê Rayberê PKKyî Abdullah Ocalan ke 21 serrî yo Zîndanê Îmralî yê Tîpê F de yeno tepiştene û şermezarkerdişê binpaykerdişê heqan yê zîndanan, dest bi çalakîya grevê vêşanîye kerdî. Derheqê grevê vêşnîye de bangawazîyê keyeyan seba paştdayîşê û wayîr vejîyayîşê çalakî zî dewam kenê.

 

'Wayîrê çalakîya ma vejîyê'

 

Xezale Polat ke lajê aye Kemal Polat Zîndanê Tîpê D yê Amedî de maneno û koma 4ine grevê vêşanî de ca girewto, vat ke lajê aye telefon de neql kerd ke heta tecrîd peynî nêbo, do çalakîya xo dewam bikerê. Xezale qiseykerdişê lajê xo wina qal kerd: "Ma tîya têkoşînê xo dewam kenê, şima zî teber de têkoşîn bikerê û wayîrê çalakîya ma vejîyê. Tedawîya nêweşan nîna kerdene, dermanê înan nêdanê. Werdê seba grevê vêşanîye sey; karbonat û awa bi şekir û bi sole nêdanê. Erzenê serê qawîşan û tehdîd kenê. Sewbîna hîn tepişteyê ke bi keyeyê xo dir rayîrê telefonî de derheqê grevî de qisey kerdê, înan kerdê de hucreyan."

 

‘Lajê mi nêberdî dadgehe û kerdî zîndan'

 

Xezale dîyar kerd ke 4 serrî verê polîsan eşto serê keyeyan û lajê aye, heme keye û merdimanê înan destbend kerdê û vat: "O wext kênaya mi keyeyê ma de bî û nêverdayî pitika xo zî bero. 12 rojî ma destbendkerde verdayî. Tu sucêk zî çinbi. Seba lajê mi bitepişnê, komployêk viraştî. Bi no hawa dimayê ke ma serbest veradayî, lajê mi nêberdî mehkema û dîrek berdî zîndan.”

 

'2 rey cezaya muebetî ya girankerde dayî'

 

Xezale dewam de wina va: "Destbendkerdiş de xeylêk rey ci ra vatê, PKKyijan keyeyê to kişto. Seba ke suc bar bikerê, îşkence ci rê kerdî. Sewbîna xeylêk rey tehdîd dir rî bi rî mend. Her wext dewaya ci ameyîne taloqkerdene. Lajê mi sey qurban ame weçînayîş. Dosya ci de çîyêk çin o, la cezaya muebetî ya girankerde dayê ci."

 

'Înan kenê hucre'

 

Xezale vat ke lajê aye grevê bînî de 120 rojî mendo û vat: "Her wext cezaya dîsîplînî, telefonî danê û înan kenê hucre. Lajê mi yew tepişteyo nêweş o. Gurçikanê ey de problem esto. 2 serrî verê zî grev de ca girewtibi. Her wext tewrê grevan beno. O wext hem keyeyî, hem zî tepişteyî zaf dejabî. Nika seba tecrîdê îmralî û seba tedayê ke înan rê yenê kerdene grev de yê. Vera çalakîya grevê vêşanîye înan kenê hucreyan."

 

'Ma do pey waştişê tutanê xo bê'

 

Xezale tewr peyîn vegdayîşê hîsgêrî kerd û vat: "Ma do pey dewaya înan de bê û waştişê înan de bê. Seba dewaya ma grev de yê. Vengdayîşê mi seba keye û komelîyo ke ma pey tutanê xo de şêrê. Eke no tecrîd wirzo do zulm û zordarî yê serê şarê ma zî wirzo."