MERKEZÊ XEBERAN - Grevê vêşanîye yo ke vera tecrîdê serê Rayberê PKKyî Abdullah Ocalanî û binpaykerdişê heqanê tepişteyan dîya destpêkerdene roja 44ine de dewam keno.

 

Grêvê vêşanîye yê bêdem biagêrayîşî yo ke tepişteyanê sîyasîyan 27ê teşrîna peyêne de zîndananê Tirkîya û herême de vera tecrîdkerdişê Rayberê PKKyî Abdullah Ocalanî û binpaykerdişê heqanê tepişteyan dabi destpêkerdene, bi koma 9ine roja 44ine de dewam keno.

 

Merdimê tepişteyan vengdayîş kerdî û vatî: “Ganî waştişê tutanê ma bêrê qebulkerdene. Berê zîndanan abibê. Wa êdî hesretê mayan peynî bibo û wa biresê tutanê xo. Tecrîd tena zîndanan de ney, hemverê ma hemine de tecrîd esto. Ganî şarê Kurdî wayîrê xoverdayîşî vejîyê.”