AMED - Muxabira ma Gulîstan Azaka ke seba xeberan taqîb bikera, şî awanîya HDPyî ya Amedî, hetê koma ke verê polîsan de berê awanî de roniştebî ra rastê hêrişê fizîkî ameye.

 

Koma ke awanîya Partîya Demokratîke ya Şaran (HDP) her roje pêwa polîsan roniştişê xo dewam kena. Kesê ke mîyanê kome de yê û hetê polîsan ra nînê astengkerdene, hêrişê kesê ke kewenê awanî û vejênê kenê. Nê kesê hêrişkar ewro zî hêrişê muxabira ma Gulîstan Azak ke seba taqîbkerdişê xeberan şîbî HDP, kerdî.

 

Gulîstane qalê hêrişî kerd, va ke awanî hetê polîsan ra ameya ablûqakerdene û polîsî heta cigêrayîş nêkerê, nêverdeve kes bikewo awanî. Muxabira ma dîyar kerd ke kesêk mîyanê koma ke awanî de manena, bi vazdayîş ameya û solan eştê, heqaret ci kerdê û şîdetê fîzîkî ci rê kerdê. Muxabira ma dîyar kerd kesê ke partî de bîyê, dimayê ke vebg eşnawitê ameyê û aye girewtê zereyê partî.

 

‘Heqareto fekî û fîzîkî ame kerdene’

 

Muxabira ma wina va: "Wexto ke ez şîya HDP mi dî ke awanîya partî hetê polîsan ra ameya ablûqakerdene. Polîsan mi ra vat, dekewtişê awanî qedexe yo û mi qartê xo yê çapemenî ramojna. Dimayê polîsan cigêrayîşê serê mi kerd, mi waşt derbazê zerî bî. Koma cinîyê ke verê awanî de nobete gênê yewe ci ra hêrişê mi kerd, sola xo vet û eşte mi û vazdayîş amî verê mi, porê mi ant û nengan çîna. Polîsan zî o wext milê mi ra girewtî û mi kaş kerdî verê berê partî ke bi barîyerê polîsan girewtibi û mi ra vatî ti cayêk akerde ra eşkena bikewê awanî. Kesê ke partî de bî ameyî teber û mi girewtî zere.”