Sema Çaglak

 

AMED - Çalakîya grevê vêşanîye ke hemverê tecrîdê Îmralî û binpaykerdişê heqê tepişteyan ameye destpêkerdene, dewam kena. Keyeyê ke tutê înan grevê vêşanî de ca gênê, reaksîyon vera bêvengîya komelî dayî û vengdayîşê paştdayîşî kerdî.

 

Çalakîya grevê vêşanîye ya hemverê tecrîdê serê Rayberê PKKyî Abdullah Ocalan û binpaykerdişê heqan 27ê teşrîna peyêne de zîndanê Tirkîya û herême de amebî destpêkerdene dewam kena. Çalakîya ke bêdem û bidor amebî destpêkerdene, bi koma 9ine dewam kena. Keyeyê tepişteyan yê Licê ya Amedî de manenê, vengdayîşê paştdayîş û wayîrvejîyayîşî kenê.

 

Nê tepişteyê ke çalakî de ca girewtê yew înan ra Sedat Baygeldîyo ke zîndanê tîpê H yê Dîlokî de maneno yo. Sedato ke koma 3ine çalakî de ca girewto, serra 2013 de ameyo tepiştene û Amed ra surgunê zîndanê Dîlokî ameyo kerdene. Maya Sedatî, Şukran Baygeldî vengdayîşê wayîrvejîyayîşî kerd.

 

'Ê seba ma pêrûne xo ver danê'

 

Şukrane dîyar kerd ke aye sey mayke tepişteyî do heta peynî xo ver bida û va: "Ewro tena tutî mi zîndan de nîyo. Xeylê tutê ma zîndan de yê û heqê înan yeno binpaykerdene, şîdet, teda û zulm bi înan yeno kerdene. Tutê ma semedo ke nê zulmî qebul nêkenê, bedenê xo dayê verê mergî. Ê tena semedê xo nê, semedê pêrûne xo ver danê. Ma ganî wayîrê çalakîya înan vejîyê. Ez heta peynî pey dewaya lajê xo de ya û pêro tepişteyê sîyasîyan a. Wa êdî keyeyî peynîya bêvengîyê xo bîyarê. Waştişê tutanê ma, waştişêk meşrû yo û ganî bêro qebulkerdene. Wezîfeyê ma keyeyan oyo ke ma wayîrê çalakî vejîyê."

 

‘Rayîrê înan rayîrêk rast o' 

 

Şukrane va lajê aye di serrî verê zî kewtibi grev û va: "Lajê mi çalakîya serra 2018-2019 de zî 90 rojî grev de mendibi. 90 rojî tay nîyo. Dimayê ke grev peynî bi, ez şîya pêvînayîşê lajê xo beden û organê ey kul û birîn bibî. La mi ey ra vat; 'lajo, no rayîrêk heq o ti tede yê, rayîrêk nêheq nîyo.' O wext zaf tepişteyî perîşan bibî, lajê mi seba ke kezeba ci awe girewtêne zaf zor amebi. Nika zî grev de yê û ez zana na rey zî kezebe ci dejena. Ez heta peynî ey destek kena. Hemverê nê zulmî, semedê tepişteyan û tecrîdî çareserîyêk mende lazim o û bi di û hîrê dayîkan têkoşîn nêbeno, ganî ma pêro wayîr vejîyê"

 

Mehmet Şîrîn Polat zî 5 serrî yo zîndanê tîpê D yê Amedî de maneno û çalakîya grevê vêşanîye koma 5ine de ca girewto. Maya Şîrînî, Şanaz polat reaksîyon vera bêvengî ramojna.

 

'Vatî qedîya yo'

 

Şanaze dîyar kerd ke şîdetê serê tepişteyan nêqedêno û va: "2 serrî verê grevê vêşanîye amebî destpêkerdene. O wext zî pêro tepişteyî pêrîşan bibî, hem zî ma sey mayî êdî kezeba ma veşabî. Semedo ke ê zîndan vêşan bî, ma nêeşkayîne parçeyêk nan biwerdêne. Lajê mi 6 mengî grev de mendibi. Nika reyna grev esto û kezeba mi veşena. Êdî vatiş qedîya yo. Ma bi serran o bendeyê tutanê xo yê. Lajê mi bê suc ame tepiştene. Lajê mi seba ke ez xemgîn nêbî qal nêkeno. La ez zana ke rewşêke zaf giran de yo."

 

'Wa waştişê tutanê ma bêrê qebulkerdene'

 

Şanaze tewr peyîn vengdayîşê hîsgêrî kerd û va: "Wa waştişê tutanê ma bêrê qebulkerdene û ê ezîyetî ra xelas bê. Wa berê zîndan bêro akerdiş.  Mayî do heta key hesretê domananê xo bê. Ma pêro binê tecrîdî de yê. Wa Kurdê ma êdî aya bê. Ma aştî wazenê. Pêro tepişteyî tutê ma yê. No bêvengî ma keyeyan zaf dejneno."