Rojda Seyidxan

 

QAMIŞLO - Xaliya Elîya ke 40 serrî ya, mêsanê hingimênî wey kena, dîyar kerd ke weykerdişê mêsê hingimênî sebir û baldarî wazeno û va: "Ez feyde weykerdişê mêsanê hingimênî ra gêna."

 

Xaliya Elîya 70 serrî dewa Hîmo ya Kantonê Qamişloyî de ciwîyena, bi 40 serrî yo mêsê hingimênîn wey kena. Xaliya pêwa emrê xo yê pîl, xebatê xo dewam kena û nika zî 10 kuwarê mêsan wey kena. Derheqê metodê weykerdişê mêsnê hingimênî de Xaliya ma rê qisey kerd.

 

'Seba weykerdişê mêsanê hingimênî baldarî lazim o'

 

Xaliya serê metodê mêsan de wina va: "Dorê 40 serrî yo ke ez mêsanê hingimênî wey kena û nika zî 10 kuwarê min ê mêsan estê. Serê sibayî ra karê mi dest pêkeno û heta saetê şanî mêsanê o ra ewnîyena. Mêsê hingimênî mîyanê  xoza û kulîlkan de ciwîyenê, seba ci lazim o qederêke zergûnayî derûdorî de bibo. Derûdorê kuwarê xo de mi vilî ramitê. Bi qasê ke berardişê mêsê hingimênî baş ê, hende zî zehmetîyê ci estê. Verê 15 serrî mi serre de di rey kuwar akerdene û hingimên vetêne. Nika nêweşîyê mi estê û tewr zehmet bîyo. Seba nê ez her serre kuwarê xo akena. Weykerdişê mêsê hingimênî de baldarî û sebir ci rê lazim o."

 

'Waştişê hingimênî keyeyî yeno kerdene'

 

Xaliya nêweşî û sebebê nêweşîyê mêsan wina ard ziwan: "Gama ke mêsî nêweş kewenê, no beno sebeb ke berardiş zî nêdê. Taybetî nê serrê peyînan de  nêweşîya mêsan zaf aver şîya, ma înan rê derman da baş bî. Bi sebebê nêweşî emsar hîrê kuwarê mi bê hingimên bî. Heto bîn ra zî mêsê hingimênî eke mîyanê xoza de nêbê, do xora zî nêweş bikewê, eke hingimên bidê zî do heme şekir bo. Ez xoza de wey kena û feyde ci ra gêna. Hingimêno saxlem bazaran de kêm o, seba nê xeylê kes waştişê hingimênî keyeyî mi ra keno."

 

'Weykerdişê mêsan rê zî pisporî lazim o'  

 

Xaliya dewam de wina qalê mêsan kerd: "Mengê sibat û adare de mêsî xo zêde kenê û mêsê newe virazyenê. Nê her di emngan de, berardişê ci hîna zêde yo. Seba mêsê ke newe virazênê, ez kewçik û tebeqe dano piro, vengê ci înan rê balkêş yeno û pêro ser de kom benê. Ez dima ra înan kena çuwalê taybet û dima ra kena kuwar. Sewbîna ez kuwarê mêsanê xo bi destê xo viraznena, kuwar herre û simer yeno viraştene, dima ra qalibê ci esto ez dana piro û wina verê tîje de bi rojan kena zuwa. Weykerdişê mêsan rê pisporî lazim o."

 

'Ez feyde weykerdişê mêsanê hingimênî ra gêna'

 

Xaliya tewr peyîn wina va: "Wexto ke ez kuwaran akena, destpêk de adir weş kena, mêsî seba dûman xo dûr danê û wina kuwar akena. Dima ra mêsê hingimênî kuwar ra vejena û kuwar reyna padana. Dima ra ez sefênena û kena şema. Xeylêk nêweşîyan rê baş o. Ez feyde weykerdişê mêsê hingimênî ra gêna."