ŞIRNEX - Qilê koyê Cudîyî de awa lêşin yê ocaxê komirî tewrê Newala Nerdûşî bena. Dewijê dewa Avgamasîya reaksîyon vera rewşe dayî û ardî ziwan ke seba newala Nerdûşî lêşin herikêna, nêeşkenê karê pesdewarî bikerê û vengdayîşê çareserî kerd.

 

Hêriş û talankerdişê xozaya Kurdistanî her ke şino zêde beno, herêma Botanî de zî talankerdişê xoza bêmabên dewam keno. Herêma Botanî de çar mengê hamnanî de daristanî ameyî veşnayîş û darî ameyî birnayene. Tewr peyîn zî şaristanê Sêgirikî yê QIebanê Şirnexî de bi 500 pezkovîyê ke hetê qorîcîya ra mabêne mengê Teşrîna peyêne û Kanûne de ameybî qetilkerdene, kewtibi rojeve.

 

Herême de nika zî qilê koyê Cudî de awa lêşin ocaxê komirî ke ameyê viraştene, tewrê Newala Nerdûşî beno û awe lêşin keno. A awa ke Newala Nerdûşî herikêna, tewrê Çemê Dîcleyî bena. Awa ke ocaxê komirî de vejêna, bena sebebê ke newale sey komir biherîkîyo. Seba nê dewijî mexdûr benê. Sewbîna dewijê Avgamasî yê girêdayê Şirnexî dîyar kerdî ke seba newala Nerdûşî lêşin herikêna, nêeşkenê karê pesdewarî bikerê û zîyanê xo awe bidê.

 

‘Baxçeyê ma ziwa benê'

 

Roniştoxa dewe ra Taybet Gûngen seba nê gerrekerdox a û va: "Ma reyan awa Newala Nerdûşî seba şimitişî zî ardêne. Na awe koyê Cûdî ra herikêna. Awa lêşin yê ocaxê komirî tewrê awe bena. Pêro darê ma yê fêkî û sebzeyî wişk bî.  Hetêk ra awa lêşin herêkêna û hetêk ra zî tozê komirî. Ma reyan na awe seba şimitişî zî xebitnayîne. Ma nêeşkenê firaqanê xo zî bişoyê. Na awe koyê Cûdî ra herêkêna û yena. Labelê seba ocaxê komirî keweno newale, ma nêeşkenê bixebitnê. Komir, cuya ma zehmet kerdo."

 

'Newale ra komir herikêno'

 

Taybete dewamê qiseykerdişê xo de va ke ê wazenê ocaxê komirî bêrê îptalkerdene û va: "Herême ma de awankerdişê ocaxê komirî dir xozaya ma ameye çinkerdene. Ma wazenê hereme de fabrîkayê ke lêşinî vila kenê û ocaxê komirî zî wa bêrê betalkerdene. Ma nêeşkenê heywananê xo rê awe bidê. Newale komir herikêno. Hamnanî pêro daristanê ma ameyî veşnayene. Ma debara xo bi xoza û daristanan kenê. La nika pêro çî destê ma ra gênê. Ma wazenê nê çî rê çareserîyêk bêro vînayene."

 

'Xozaya ma yena talankerdene'

 

Welatija bi nameyê Hurî Nas zî wina va: "Baxçeyê ke dorê newale de yê heme ziwa bî. Newale seb açend ocaxê komirî yena lêşinkerdene.  Na awe koyê Cûdî ra herikyayîne û zaf pak bî. Ganî ma na awe pak bipawê. Ma nika nêeşkenê na awe ne bixebitnê ne zî bişimnê. Seba ke ocaxê komirî qilê koyê Cûdî de ameyê akerdene, xozaya ma yena çinkerdene û nika zî awa ma ra komir herikêno. Sebze û fêkîyê ma êdî nînê werdene. Na awe lêşin bena sebebê nêweşîyan. Ma mexdûr ê, wa problemê ma bêro çareserkerdene."