WAN - Emîne Bozkurt dîyar kerd ke yew sebebê tayînkerdişê qeyûman ê seba STOyan oyo ke cinîyan newe ra vejê teberê cuye. Emîne dîyar kerd ke paştdayîşê cinîyan bi qeyûman nêqedêno.

 

‘Pêkerdişê Qanûnê Derheqê Vernîgirewtişê Fînansmanê Vilabîyayîşê Çekê Îmhayê Girseyî’ ke parlamenterê AKPyî da TBMMyî, meclîs ra derbaz bi û bi qanûn. Rewşa ke pêkerdiş bêro qebulkerdene, eşkeno qeyûm seba STOyan bêro tayînkerdiş yan zî  falîyetê înan bêrê vindartiş. Dimayê ke pêkerdişê qanûnî şî meclîs, her cayê Tirkîya ra vengdayîşê, peyser biancê ameyî kerdene.

 

Endama Komeleya Cinîyan ê Star Emîne Bozkurt derheqê tayînkerdişê qeyûman ê seba komeleyan fikrê xo dîyar kerd.

 

'Cinî do reyke bîn mexdûr bê'

 

Komeleya Cinîyan ê Starî Emîne Bozkurt dîyar kerd ke serrêk verê bi qerarê wezaretê karê zereyî, qeyûm tayînê şaredarîyan ameyo kerdene û bi KHKyî sazgehê cinîyan ameyê girewtene û bi amancê alternatîfî Komeleya Cinîyan ê Starî awan kerdê û va: "Endamê komeleye xeylê cinîyê ke binê banê mudurîyê polîtîkayê cinîyan e xebityenê û bi KHKyî dir ameyê îxrackerdene yê. Seba nê bi tayînkerdişê qeyûman reyna cinî do bêrê mexdûrkerdene."

 

'Cinî wayîr vejîyayî'

 

Emîne dewam de wina va: "Pêwa îmkanê bi sînor ma paştdayîşê cinîyan girs kerd û bi taybet nê prosesê serrêk de cinî wayîrê komelî vejîyayî. Muracatê seba şîdet, domanê ke rastê îstîsmarî amebî, cinîyê ke waştêne fek mêrdeyê xo ra vera bidê ameyî kerdene. Sewbîna welatijan waştêne ke ma dir sohbet bikerê, dayîne berê ma ro."

 

‘Ma seba 20 wareyê huqûqî muracat girewt'

 

Emîne qiseykerdişê xo wina dewam kerd: "Resmîyet de m a7 cinî bî, la bi seyan cinî ma dir xebate kenê. Hetê huqûqî de zî dewayê ke avûkatê ma zerrîwaştoxî beşdar bîyê, 20 muracatê ma estê. Sewbîna psîkologê ma yê zeerîwaştoxî zî cinîyê ke rastê şîdetî ameyê, destekê psîkolojîk ame dayene."

 

'Ma do heta peynî paştdayîş bidê'

 

Emîne qiseykerdişê xo wina domna: "B.T bi serran rastê şîdetê mêrdeyê xo ameya. Seba veradayîşî, muracatê ma kerd û paştdayîş waşt. Veradayîş heqêqe yo la çi heyf sey şermêk yeno vînayene û cinî mehkûmê zewacî yenê kerdene. Ma pêwa dermankerdişê psîkolojîk, avûkatanê xo kerd dewre û ma paştdayîş da B.T. Ma do heta peynî paştdayîş bidê."

 

‘Amanco esas bêvengkerdişê vengê komelî yo'

 

Emîne tewr peyîn wina va: "Fikrê komelî zî benê babetê cipersayîşî û derheqê nê de bi desan serrî ceza yenê waştene. Coka zî hema hema heme embazê ma yê ameyê îxrackerdene zî sazgehî ameyî padayene. La paştdayîşê cinîyan bi qeyûman nêqedênê û xebatê înan mehkûmê sazgehan nêeşkeno bêro kerdene. Ma do her rewşe de têkoşînê xo dewam bikerê."