Medya Uren

 

MÊRDÎN - Grevê vêşanîye yo bêdem û bidor roja xo ya 41ine de dewam keno. Tepişteya bi nameyê Nurcan Aslan bi rayîrê keyeyê xo vengdayîşê paştdayîşî kerd û dîyar kerd ke çalakî rê bibê veng. Maya Nurcane, Muzeyen Aslan zî wina va: "Verê her çî tecrît sucê merdimayî yo. Bi milyonan kurdî, bi hezaran tepişteyê sîyasî yenê tecrîdkerdene. No nêzdîbîyayîşê înan vera kurdan ramojneno. Tepişteyî pêro heqanê xo ra ameyê mehrum kerdene. Tepişteyî pêro binê tecrît de yê."

 

Seba ke tecrîdê serê Rayberê PKKyî Abdullah Ocalanî peynî bibo û seba binpaykerdişê zîndanan peynî bibo, tepişteyê PKKyî û PAJKyî 27ê teşrîna peyêne de dest bi grevê vêşanîye ya bêdem û bidor kerdî. Grev ke pêro zîndanan de vila bi, roja xo ya 41ine de dewam keno. Roja destpêk ra heta ewro, tepişteyî bi rayîrê keyeyê xo waştiş û umîdê xo anê ziwan. Keyeyî zî vengdayîşê hîsgêrî kenê.

 

'Ma êdî tecrît rê bêveng nêmanê' 

 

Yew nê tepişteyan ra Nurcan Aslana ke  20 serrî ya. Nûrcane emrê 16 serrî de Nisêbîn de yena tepiştene. Pêwa emrê xo 21 serrî ceza gêna. 2 mengî dima aye Zîndanê Mêrdînî ra surgunê Zîndanê Tîpê T yê Tarsûsî Mêrsînî kenê. Nurcana ke koma yewin de ca girewtibî, bi rayîrê telefonî xo resna keyeyê xo. Nurcane wina va: "Êdî ma tecrîd qebul nêkenê. Bêvengî çareserî nîya. Ma azadî wazenê. Şikinayîşê tecrîdî azadîya şarê Kurdî yo, azadîya ma pêrûne yo. Bi nê amancî tepişteyî bidor dest bi grev kerdî. Ez koma yewin de bîya. Çiqas bidor bo zî ma do taqîbkerdoxê proseî bibê."

 

'Çîyê ke yenê sereyê Kurdan çîyê normal nîyê'  

 

Nurcane keyeyê xo rê wina qalê çalakîya koma yewine kerdibî: "Rewşa ma baş a. Ma do têkoşînê xo bi her hawa dewam bikerê. Heta ke tecrîd nêşiko, ma nêvindenê. Wext wextê azadîye yo. Eke lazim bikero, ma do nê  oxirî de dinyaya xo bdeilnê. Çîyê ke yenê sereyê şarê Kurdî normal nîyê. Lazim o êdî qebul nêkerê û sere wedarnê. Ma do pîya vajê bes o."

 

'Tepişteyî pêro yenê tecrîdkerdene'

 

Dayîka Nurcane, Muzeyene Aslan, sere de bale ant serê tecrîdê hemverê Rayberê PKKyî Abdullah Ocalanî û wina va: "Verê her çî tecrîd sucê merdimayî yo. Merdimêko 22 serrî yo yeno tecrîdkerdene. Ey dir bi mîlyonan merdimî û tepişteyî yenê tecrdîkerdene. Tutê ma bêsuc ê, seba ke Kurd ê rehîn ameyê girewtene. Ê bi îşkenceyê psîkolojî û fîzîkî dir zî rî bi rî ameyê. Pêro heqanê xo ra ameyê mehrumkerdene. Tepişteyî pêro tecrîd de yê."

 

‘Şûwbe seba caardişê tecrîdî bi firsend'

 

Muzeyene wina dewam kerd: "Kênaya mi emrêk qij de ameye tepiştene. Seba ke rastê îşkenceyê giranan ameya, tewir tewir nêweşî aye dir peyda bîyê. Nika tehlukeyê korona esto la tu tedbîr nîno girewtene. Ma tutanê xo serrêk ra reyke vînenê. Gardîyanî bê tedbîr, kewenê mîyanê înan û şinê yenê. Hacetê pakitî kantînan de vay kerdî. Xo rê şûwbe her tewir kerdî firsend."

 

'Seba pêro tepişteyan serkewtiş'

 

Muzeyene va ke ganî seba çalakî paştdayîşê ke xurt bo û va: "Nika vera pêro bêheqîyan, seba şikitişê tecrîdî tepişteyî kewtî grev. Ez serkewtiş pêro tepişteyan rê wazena. Ganî ma pêro bar nêdê serê paşta înan. Lazim o ma heme ewro qisey bikerê. Seba ke serkewte bibê, lazim o m abêveng nêmanê."

 

'Şiknayîşê tecrîdî seba ma pêrûne azadî yo' 

 

Muzeyena tewr peyîn wina va: "Kênaya mi bi moralê xo, bi coşê xo moral da ma. Rewşa înan zaf baş bî. Tena waştişêk înan estbi, paştdayîş."