Melike Aydin

 

STENBOL - Vervatoxa Demî ya TOPî Perîhan Koca ke reaksîyon vera tepiştişê Hemsereka KCDyî û Aktivîsta TJAyî Leyla Guven ramojna wina va: "Tepiştişê Leyla, hemleyêk sazkerdişê faşîzmî yo."

 

Dimayê ke 22 serrî û 3 mengî ceza Hemsereka Kongreya Komela Demokratîke (KCD) û Aktivîsta Tevgerê Cinîyê Azad (TJA) Leyla Guven rê ame birnayene û dima ra zî aye 22yê Kanûne de erşawitî Zîndanê Tîpê T yê Amedî û dima ra surgunê Zîndanê Tîpê E yê Xarpêtî ameye kerdene. Xeylêk reaksîyonî vera tepiştişê Leyla Guvene dewam kenê.

 

'Îqtîdar hem zere de hem zî teber de kewt tengasî'

 

Vervatoxa Demî ya Partîya Azadîya Komelî (TOP) Perîhan Koca, dîyar kerd ke tepiştişê Leyla Guvene, hemleyêk sazbîyayîşî faşîzmî yo û wina va: "Îqtîdar hem zere de hem teber de teng bîyo. Her ke şino îtîbarê xo vinî keno. Tepiştişê Leyla qerarêk sîyasî yo. Seba polîtîkayê tasfiyekerdişê kurdan, qerarê sîyasî yenê girewtene. Seba Leyla Guven zîndan de sere wederna û demo ke vejîya mîyanê şarî de çalak bî, coka ameye tepiştene. Sewbîna şar reaksîyonê vera hêrişê STOyan dayî û munaqeşeyê vera derheqê Pêameyîşê Stenbolî danê."

 

'Tepiştişê Leyla hemleyêk sazbîyayîşê faşîzmî yo'

 

Perîhane tayînkerdişê qeyûman ê şaredarîyan ke 31ê Adara 2019 de ameyî kerdene ard vîr û va: "Çend rojî vervatoxa  HDPyî Ebrû Gunay hûmarêk pîl eşkera kerd. 10 hezar HDPyî mîyanê prosesê nêzdîyê panc serran rehîn ameyê girewtene. Bi taybet, şîdet zî hetê dewlete ra rayîrê ci ameyo akerdiş. Padayîşê HDPyî her wext rojeve de yeno verdayîş. Eşkerayîyê Bahçelî û Soylu, vatişê qerarê AÎHMyî yê derheqê Selahattin Demirtaşî m aeleqedar nêkeno, tepiştişê Leyla Guven û hedefgirewtişê Rêxistinê Komelê Sîvîl sazbîyayîşê faşîzmî ramojneno. Coka tepiştişê Leyla hemleyêk sazbîyayîşê faşîzmî yo."

 

'Tevgerêk cinîyan esto'

 

Perîhane wina dewam kerd: "Pêwa şerdê xidar yê pandemî zî cinîyan seba Pêameyîşê Stenbolî nêro wedaritene, vejîyayê meydanan. Sewbîna çalakîyê xo yê 25ê Teşrîna peyêne organîze kerdî. Nika têkoşînêk şarî esto û no zî tayn nîyo."

 

'Ganî rêxistinbîyayîş aver şêro'

 

Perîhane wina qedêna: "Tevgerê cinîyan seba rêxistinbîyayîşî rayîr akeno. Pratîkê cinî pîya bi hêz ê, modelê serewedaritişî vejeno werte. No modelêk girîng o. Coka ganî rêxistinbîyayîş raver şêro. Ganî metodê cîya yê serewedaritişî zî ma vejê vernê. Ma eşkenê wina serkewte bê."