Dilucan Bozî

 

KOBANÊ - Temsîlkara Heyetê Cinîyan ê  Herêma Firatî Rozîn Mihemed rewşa cinîyê ke herême binê kontrolê dewleta tirkî û komê girêdayê ci ercna. Rozîne wina va: "Dewleta tirkî û komê çeteyê girêdayê ci wazenê ke komelî şexsîyetê cinî de bêveng bikerê, la îradeyê cinîya azad wehşetê xurtir keno û do beramberê wehşetî têkoşîn bikerê."

 

Herême binê kontrolê dewleta tirkî û komê girêdayê ci roj bi roje cinî rastê kerdişê bê exlaqî yenê. Şîdetêke pîl Serêkanî, Girê Spî û Efrînî de yeno meydan. Herêma Efrînî de destpêk de demografîyê ci vurnayî û dest bi remnayîş, kiştiş, talankerdiş û xirabkerdişê gorê pakrewanan ame kerdene. Efrîn de bi seyan cinî ameyî tepiştiş û remnayîş, gorê çimeyê ke ma Tv Sky News girewt Artêşa Niştîmanî Sûrî nê cinîyê tepişteyê bi rayîrê berê Meiber Hewar Kilis yê leşkerî, Meiber Xelîlî, sewbîna rayîrê dewa Hemam yê leşkerî de Cindirêsî derbazê Tirkîya kenê û uca ra zî derbazê Lîbyayî kenê û cinîyan seke kole xebitnenê. Derheqê babete de Temsîlkarê Heyetê Cinîyan yê herêma Firatî de Rozîn Mihemed qisey kerd.

 

'Efrîn de cinî zulm vînenê'

 

Rozîne bale ant serê kerdişê dewleta tirkî û komê girêdayê ci yê serê herêma Efrînî û va: "Dewleta tirkî ya îşxalkerde dişminîya cinîyan kena û wazena bi rayîrê şikinayîşê îradeyê cinîyan komel çin bikera. Mîyanê heme sazgeh û dezgehê Efrînî de cinîyê dinya cayê xo girewtibî û rolê xo mîyanê sazgehan de kay kerdêne. Sewbîna hetê ramitişî de zî wayîrê rol bîyayîş, girêdayîşê cinîyê Efrînî bi xoza dir esto, coka her wext xizmetê herre, dar, bostan û ramitişî kerdêne. Ma nika bala xo bidê kampê Şehbayî seke kampê serdem, xoverdayîş û agêrayîşî cinîyan gul, dar û baxçe ramitişî zî ramojneno ke girêdayîşî cinîyan ê bi xozayî dir esto. Her çî bi destê cinîyan yeno awankerdene, seba nê zî cinî ciwîyayîş awan kena û bi hawayêk çalak mîyanê kar û xebatî de yê."

 

'Dewleta tirkî şexsê cinî de wazena komel pûç bikero'

 

Rozîne bale ant serê hêrişê cinîyan ê herême de ameyê îşxalkerdene û wina va: "Dişmin tewr zêde cinîyan keno amancê hêrişê xo û cinîyan dano remnayîş. Rewşa cinîyan herêma îşxalkerde de roj bi roje ver bi xirabîyayîşî şina, şîdetê tewr zêde serê herêmê îşxalkerde de yenê kerdene. Çeteyê ke nika herême ray benê, nêverdenê ke cinî sereyê xo vejê teber, gama ke cinî vejîyo zî lazim o her cayê xo pada. Senîn çeteyan Reqa de bi cinîyan kerdî, ewro nê kerdişanê xo Efrîn, Girê Spî û Serêkanî de reyna keno. Wazenê şexsê cinîyan de komelî pûç bikerê, seba ke cinî komel rayîra bena."

 

'Cinî yenê remnayîş'

 

Rozîne dewam de wina va: "Dewleta tirkî û çeteyê girêdayê ci şîdeto tewir bi tewir ardî serê cinîyan û heta nika zî no şîdet yeno kerdene. Çira dewleta tirkî û çeteyê ci wazenê cinîyan derbazê Lîbya bikerê? Seba pêameyîş mîyanê Lîbya û dewleta tirkî de esto. Goreyê ke ma xeberan temaşe kenê, Sky News arabîyê xeberêke weşan kerd ke cinîyê Efrînî derbazê Lîbya yenê kerdene. Kesê ke çeteyan bi rayîr benê û serkêşîyê înan kenê, dewleta tirk û Qeter o."

 

'Cuye Efrîn de bîya cehenem'

 

Rozîne dîyar kerd ke dewleta tirkî wazena plan û projeyê ke Şengal de kerd, Efrîn de dewam bikera û va: "Serra 2014 de reyna bi destê çeteyê dewleta tirkî, cinîyê Şengalî ameyî remnayîş û bazaran de ameyî rotiş û hema zî nê kerdişan dir rî bi rî yê. Wazena ke nê plananê xo Efrîn de zî dewam bikera. Êdî cuye Efrîn de bîya sey cehenem, coka xeylêk kes wazenê ke herêman ra vejîyê û verê xo bidê herêmê xelisnayeyî. Mimkun nîyo ke kesêk Efrîn ra vejîyo, seba ke rastê işkence, zehmetî, dej û şîdet yenê. Pêro cinîyê ke yenê remnayîş û tepiştiş, çeteyî înan derbazê Îqab û dima ra zî benê Idlib. Zîndan de her tewir wehşet, desteştiş, tecawuz û îşkence yeno kerdene. Ma sey Heyetê Cinîyê yê Herêma Firatî rojane rewşa cinîyê ke herêmê îşxalkerde taqîb kenê. Ê hewl danê ke bi rayîrê kombîyayîş û munaqeşeyî wayîrê nê cinîyan vejîyê û cinîyan nê şîdetî ra bixelisnê."