AMED - Aktîvîsta TJAyî Bahar Karakaş, çarçewaya kampanyaya, "Ma xo pawenê" ke dabî destpêkerdene de dîyar kerd ke ê do seba tecrîdê serê Rayberê PKKyî Abdullah Ocalanî peynî bibo, têkoşîn pîl bikerê û va: "Têkoşînê zîndanan ke ameyo destpêkerdene, ganî teber de zî bêro kerdene."

 

Tevgerê Cinîyê Azadî (TJA) 15ê Êlula 2020 de hemverê tecrîdî hêrişê serê ziwanê dayîke, desteştiş û tecawuz, qirkerdişê sîyasî û hemverê hêrişê bawerîyan, kampanyaya "Ma xo pawenê" dabî destpêkerdene. TJAyo ke 4 mengî yo kampanya pey xo de verda, dîyar kerd ke ê do kampanya xo 2021 de zî dewam bikerê. TJAyî dîyar kerd ke prosesê newe yê kampanya de ê do giranî bidê serê tecrîdo girankerde yê Îmralî de serê Rayberê PKKyî Abdullah Ocalanî de yeno kerdene û do têkoşînê xo girs bikerê.

 

'Ma do mîyanê çalakîyan de bê'

 

Aktîvîsta TJAyî Bahar Karakaş, dîyar kerd ke 4 mengê kampanya de kuçe bi kuçe, tax bi taxe gêrayê û cinîyan dir ameyê têhet. Bahare dewam de wina va: "Ma eşkenê xo bipawê. Seba ke mekanîzmayêk ma bipawo çinbi, ma dest bi kampanya kerd. Ma hêzê xo, xo ra gênê. Yew sernameyê kampanya ma zî têkoşînê vera tecrîdî yo. Wexto ke ma kampanyaya xo raver berdêne, çalakîya grevê vêşanîye ameybî destpêkerdene. Tarîxê tirkîya de xoverdayîşê zindanan adetêk o. Ma do destek bidê grevê vêşanî yê zîndanan, ma do çalakîyê tewir bi tewir bi ca bîyarê. Ma do hem wareyan de û hem zî serê medyaya dîjîtale de.

 

'Sîyaset û tecrîd pîya yenê kerdene'

 

Bahare dewam de wina va: "Seba ke çalakîya zîndanan pozîtîf netîce biba, ganî ma teber de bibê vengê tepişteyan. Seba ke tecrîdê serê birêz Ocalan bêro wedaritene, ganî xoverdayîş bêro girskerdene.  Start reyna zîndanan ra ame. Werrekna ma teber de qasê ke qîm keno têkoşîn bikerdêne, zîndanan de grevê vêşanîye nêameyîne destpêkerdene. Çîyo ke keweno serê milê TJAyî do paştdayîşê xo xurt bikero û çarçewaya kampanya ke ma daya destpêkerdene de ma do vera tecrîdî de têkoşîn bikerê. Sîyasetê Tirkîya û tecrîdê Îmralî pîya yeno kerdene. Çiqas tecrîd giran bo hawaya siyasetî zî hende giran o."

 

'Çîyo tewr baş oyo ke komel wayîrê têkoşînî vejî yo'

 

Bahare tewr peyîn qiseykerdişê xo de wina va: "Çîyo tewr baş oyo ke komel wayîrê têkoşînî vejîyo. Çiqas xoverdayîş girs bo, do dewlete zî bikewa tengî û çareserî bikera. Seba ke çîyê negatîf nêrê meydan ganî ma wayîrê grevê vêşanîye vejîyê. Eke dewlete çareserîyêk bi ca bîyara, do şarê Tirkîya boyêk hîra û rehet bigîrê. Bi hêvîya ke serra 2021 biba serra aştî û çareserî xo dir bîyara."