Sorgul Şêxo

 

HESEKÊ - Cinîyê ke dewa Dirdarî de ciwîyenêî dîyar kerdî ke di mengî ra zêdeyêr o hêrişî zêde bîyê û vatî: "Dinya bi fîşekê hewayî û ma zî bi topvaran û obîsê çetayan serra neweyî 2021î pêşwazî kenê."

 

9ê Teşrîna verêne 2019 ra heta nika şarê Vakur û Rojhelato Sûrîye, taybet yê seranserê sînorê Rojawan û vakurê Kurdistanî de, benê hedefê top, teyare û guleyê dewleta tirkî. Hêzê Rûsî garantore herême û bîyayîşê leşkerê hukmatê Şamî, hemverê hêrişan bi wezîfeyê xo tênêgeyrenê. Xeylê rey baragehê Hêzê Rûsî yê qezaya Til Temirî ameyî topvarankerdene. La heta nika tu helwest nêameyo ramojnayîş. Çeteyan xeylêk noqteyê xo serê rayîrê M4 û Zirganî de zî viraştî û bi desan çek û cebilxane û çeteyê xo sewqê dewanê Erbîn, Leylan, Qasimiyê, Rîhaniyê û Reşîdiyî kerdî.

 

Şewêke bê gulevaran û topvaranê çeteyan derbaz nêbena. Welatijê dewa Dirdarayî pêwa ke şer esto, her serra newe pêşwazî kenê û hîs û fehmê xo ajansê ma dir pare kerdî.

 

'Çend ez vazdayîne ez leqetyayîne û kewtêne'

 

Metra El-Hemad ya 70 serrî demo ke ma verê xo dayîne dewe,  rayîrê ke şîne Til Temirî de roniştibî û destê aye verê rîyê aye de bi, û fikirîyayîne ke senî şêro Til Temir û uca ra vejîyo Hesekê. Seba şêro verê doktor ke nêweşîya xo rê derman bivîna. Wexto ke mi persê rewşa ye kerd, Bi keserêk kûr û derg cewab da û va: "Ma ez o çi vajî û çi nêvajî, vizêr nê saetê şanî de topvaran virazîya û ma bi zor ganê xelisna. Ma ver bi erdê ramitişî de şî. Her gamêke ez rayîra şîne ez kewtêne mîyanê herre. Ma zaf aciz bî û merg bi çimanê xo dî. Her ke ma vazdayîne topvaran hîna zêde bîne, yew nêzîdyê cayê çemî kewt. Saete 1 ra ma çol de verê serd û seqem de bî. Ma merg verê çimanê xo de dî, seba ke ez vazdayîne, ez leqetyayîne ginayîne erd ro. Tena ma ney, ma pes û mangayê xo zî vetî."

 

'Kêfweşî û coş serra neweyî de çin o'

 

Metra ke seba doktorî rê erey nêmano tewr peyîn qiseykerdişê xo de hêvî û waştişê xo yê serra 2021 ard ziwan û va: "Ma mîyanê nê şerî û tersî de serra neweyî senî pîroz bikerê? Gama ke şer çinbo serra ma cenete ya, la gama ke şer, topvaran û ters bibo; kêfweşî ma rê çin o. Ez hêvî kena ke no adir bitefo û şer vindero û ma reyna agêrê cuya xo. Hêvîyê mi serkewtiş o."

 

'Dinya bi fîşekê hewayî û ma zî bi top û obîsan pêşwazî kerd'

 

Emîra El-Erna pêwa tutanê xo fek herra xo û keyeyê xo ra vera nêdaya. Emîra vatişê xo serra 2020 de va û hêvîyê xo zî wina va: "Serra 2020 ma bi îşxalkerdiş, topvaran, şer û koçberî derbaz kerd. Nika zî dinya serrneweyê 2021 bi fîşekê hewayî û ma zî bi top û obîsê dewleta tirkî yê îşxalkerde pêşwazî kerd. Hêvîya mi serra newe ra oyo hizûr bêro."