AMED - Çalakîya grevê vêşanîye roja 37ine de ya. Her roja ke derbaz beno, ters û endîşeyê keyeyan zêde beno. Lajê Sevgî Kaya tepişte yo  û Sevgîye veng da komel û va: "Tutê ma zîndanan de yê, seba ma grev de yê. Ma do senî cayê xo de rehet vinderê, senîn bi zerrîya ke rehet werd biwerê. Kesê ke vanê, ez kurd a wa wayîrê erjê xo vejîyê."

 

Hemverê tecrîdê serê Rayberê PKKyî Abdullah Ocalan û binpaykerdişê heqan ê zîndanê Tirkîya û herême de 27ê teşrîna peyêne de grevê vêşanîye yo bêdem û bidor ame destpêkerdene dewam keno. Ewro 37ine roja çalakîye ya. Seba wayîrvejîyayîşê çalakîya grevî û ke waştişê tepişteyan bêro qebûlkerdene her hat ra vengdayîş yeno kerdene. Bi taybetî zî keyeyê tepişteyan, seba rewşa tepişteyan bi endîşeyîn ê û vengdayîşê hîsgêrî û paştdayîşî kenê. Azîz Kaya Zîndanê Tîpê D yê Amedî de tepişteye yo, maya ci Sevgî Kaya ajansê ma rê qisey kerd.

 

‘Wayîrvejîyayîş lazim o'

 

Sevgî dîyar kerd ke bêvengî û ters verê tu çîyan nêgîno û wina va: "Lajê mi zîndan de yê û nêweş ê. La yê ke zîndan de yê raştî zî heme sey domananê min ê. Seba ke ewro têkoşîn ten atêkoşînêk kes/e nîyo. Têkoşînê şarê Kurdî yo. Rewşa zîndanan her ke şino, xirab beno. Şert û mercê zîndanan de binpaykerdişî tewr zêde yo. Ez eşkena nê çî zî vajî ke hetê pawitişê zîndanan de bêvengîyê zaf pîl komelî de esto. Vera wayîrvejîyayîşê grevê vêşanîye, bêvengî nîna qebulkerdene. Lazim o ke çîyê ke destê ma ra yenê, ma bikerê. Wayîrê waştiş û çalakîya înan vejîyê. Bi taybetî zî seba keyeyê tepişteyan vana, wa bêveng nêmanê ters verê tu çîyêk nêgîno. Xora merg esto, tepiştiş û tepiştiş û teda serê ma kurdan de qetî nêqedêno. Ewro tecrîdê Îmralî yeno manaya tecrîdê hemverê şarê Kurdî. Eke ewro ma nê tecrîdî tesdîq  bikerê, ê do tecrîdê serê xo qebul bikerê. Çiqas şino zî tecrîd bi teda û ablûqa serê ma de zêde keno."

 

‘Zîndanan de problemî nêqedênê'

 

Sevgîye va problemê zîndanan nêqedênê û wina va: "Wexto ke ma şinê zîndanan, probleman ma rê vejenê. Gama ke ma şinê pêvînayîşan, eke hesabê înan bêro ma geyrenê la eke hesabê înan nêro, nêkenê zere. Ma reyke şî saete 10 de seba pêvînayîşî la ma nêgirewtî heta saete 14.00 de ma teber de binê serdî de mendî. Nê şert û mercî rast nîyê. Ma zî heqê xo wazenê. Seba ke ma kurd ê, ganî ma mecbûrê rastê her tewir hêrişan bêrê.  Ganî no ma rê meşrû nêro vînayene. Tu heqê ma bi ca nêanê, her heqê ma binpay kenê. Hetê hîjyenî de tepişteyî zaf problemî ciwîyenê, hetê maskeyî de zî eke zerrîya înan ra bêro danê. Ê zî maskeyan bi îmkananê xo gênê, la sewbîna nînê dayene. Wa yê ke vanê ma heqê merdiman pawenê û rêxistinê sîvîlî veng vejê. No bêvengî çîyêk baş nîyo."

 

‘Wayîrê erjanê xo vejê'

 

Sevgî tewr peyîn wina va: "Nêzdîyê di serrî yo çalakîya grevê vêşanî de 2 laj û birayê mi zî ci de ca girewtibî. O wext zî zaf zirarê pîl vejîyabî. Pêro tepişteyan hetê weşî ra xisarê pîl dî. Yê ke çimê xo vinî kerdî, gurçik û bedenê înan de problemî vejîyabî. Beno ke na rey zî nê problemî vejîyê. Tutê ma zîndanan de seba ma bedenê xo dayê verê mergî, ma zî çiqas destê ma ra bêro ma hewl bidê. Pêwa nê çîyan ma senîn cayê xo de rehet vinderê, senîn bi zerrîyêka rehet awe û nan biwerê. Vengdayîşê mi taybetî seba keyeyê ke vanê ez kurd a û wayîrê erjê xo vejênê yo. Wayîrê çalakî vejîyê. Ganî na çalakî veng nêvejîyo."