Rojda Aydin

 

ŞIRNEX - Mayê Şirnexijî, bale antî tecrîdê serê Rayberê PKKyî Abdullah Ocalanî û ardî ziwan ke bi girankerdişê tecrîdî dir Tirkîya de rewşe ver bi xirabî şina û mayan va: “Seba wedaritişê tecrîdî ganî ma dayîkî rayberî bikerê. Ma pîya vajê, berê Îmralî bişiknê û tecrîdê serê Serekî wedarnê. Yewîya ma do ma rê serkewtiş bîyaro.

 

Tecrîdê hemverê Rayberê PKKyî Abdullah Ocalan roj bi roje tewr giran beno. Qerarê sey qedexeyê telefon û qedexeyê pêvînayîşê bi avûkatan dir zî girankerdişê tecrîdî ramojneno. Hemverê tecrîdî reaksîyon û nêrazîbîyayîşê şarî her roje tewr zêde benê. Sewbîna zîndanê Kurdistan û Tirkîya de dimayê grevê rayberîya Leyla Guvena ke hemverê tecrîdê zîndanan ame destpêkerdene de reyna tepişteyê dewaya PKK û PAJKî zîndanê cîya cîya de yenê tepiştene, hemverê tecrîdî û binpaykerdişê heqan 27ê Teşrîna peyêne de çalakîya grevê vêşanîye ya bêdem û bidor dayî destpêkerdene.

 

Mayê Şirnexijî reaksîyon vera tecrîdo girankerde ramojnayî û vatî, tecrîd sucê merdimayî yo.

 

'Serê Serekî de zulm kenê'

 

Zumrete Çakir va, tecrîdo girankerde zulm o û hemverê merdimayî yo. Zumrete, dîyar kerd ke 20 serrî yo Abdullah Ocalan binê tecrîdêk giran de yo û wina va: "Serê Serekî de zulm ken. No zulm û tecrîd nîno qebulkerdene. No tecrîdo girankerde tu dewlete de nîno qebulkerdene. Bi girankerdişê tecrîdî dir nêwazen ke pêvînayîş bêro kerdene. Wa peynîya nê tecrîdê girankerde bîyarê. Eke no tecrîd peynî bibo, do şer zî peynî bibo. Seba ke eke Serek fikr û fehmê xo bîyaro ziwan, do çareserîyêk bêro vînayene."

 

'Ma do seba wedaritişê tecrîdî rayberî bikerê'

 

Zumrete, seba wedaritişê tecrîdî wina veng da: "Seba no tecrîd peynî bibo, ganî şarê Kurdî wirzê serê lingan û wayîrê serekê xo vejîyê. Wedaritişê tecrîdî û azadkerdişê Serekî destê ma de yo. Eke ma vengê xo berz bikerê û vera tecrîdî vejîyê do peynî bibo. Ma ewro xeyrê Serekî ra bîyayîşê cinî û heqê cinîyan nas kenê. Ma xeyrê ey wiştî serê lingan û ma dest bi têkoşîn kerd. No serkewtişê ke ma bi dest kerdo xeyê Serekî ra yo. Ganî seba wedaritişê tecrîdî zî ma cinî vengê xo berz bikerê û seba wedaritişê tecrîdî rayberî bikerê."

 

'Serek ra tersenê'

 

Ayşe Hezer zî dîyar kerd ke tecrîdê serê Abdullah Ocalanî ameyo girankerdiş, vera merdimayî yo û va: "Tu cayêk de nimûneyê nê tecrîdî çin o. Ganî her kes vera nê tecrîdo girankerde, vengê xo berz bikerê. Tepiştişî rayberêk yê zîndanî nîno qebulkerdene. Kesê ke ewro Serekî tepiştê û tecrîd ser de giran kerdê ci ra tersenê. Coka tecrîd giran kerdê. Destûr nêdanê ke ne keye û ne zî avûkatî bi Serekî dir pêvînayîş bikerê."

 

'Do tecrîd rojêke bêro wedaritene'

 

Ayşe, dewam de wina va: "Bi girankerdişê tecrîdî dir şîdet û qirkerdişê cinîyan, desteştişê tutan zêde bîyo. Sewbîna goristanê ma pêro ameyî rijnayene. Esteyê domananê ma ra zî tersenê. Hêrişê partîya ma kenê. Her het ra hêrişê ma kurdan kenê. Labelê ê se kenê wa bikerê, ma înan ra nêtersenê. Ma sereyê xo qetî vera înan de nêtewênenê. Ma do her wext serê rêçe tutan û partîya xo de bê. Bi serran o vera ma kurdan de astengî û qedexeyan awan kenê. Sebebê nê çîyan zî girankerdişê tecrîdî yo. Ê se kenê wa bikerê no tecrîd do rojêk peynî bibo."

 

'Yewîya ma do ma rê serkewtiş bîyaro'

 

Ayşe tewr peyîn wina va: "Ma do wayîrê Serek û tutanê xo vejîyê. Ganî ma mayî hemverê kiştiş û hêrişan dest bidê yewbînan. Seba hemverê şerî, yewîye girîng a. Ganî ma mayî pêro wirzê ser lingan û dest bidê destê yewbînan. Ma do pîya vajê berê Îmralî bişiknê û tecrîdê serê Serekê xo wedarinê. Wexto ke ma bibê yew o wext erdogan zî mecbûr do tecrîd wedarno. Yewîya ma do serkewtiş bîyaro û ma do serkewte bê."