Melîke Aydin

 

ÎZMÎR - Sehep Sayana ke merdimê tepişteyo ke Zîndanê Alanya de yo neql kerd ke zîndan de kesê ke dimayê dorê înan ê grevî qedêno û dest bi grevê vêşanîye ra vera dayê înan rê cazaya hucreyî yena birnayene. Sehepe va ke seba peynîya grevê vêşanîye bêro dayene, wedaritişê recrîdê serê Rayberê PKKyî Abdullah Ocalan kerd.

 

Dayîka Ramazan Sayano tepişte, Sehep Sayan va seba tepişteyê Zîndanê Alanya ke seba Rayberê PKKyî Abdullah Ocalanî 5 rojî grevê vêşanîye de bi, cezaya hucre dayê. Sehepe va ke lajê aye zî 5 serrî yo zîndan de yo û va ke qiseykerdişê telefonî de musayê ke cezaya hucre ci rê dayê. Sehepe neql kerd ke do grevê domdar û bidor agêrê grevê bêdor û waşt ke waştişê tepişteyan bi ca bêro.

 

'Eke lazim bo ma do zî bikewê grevê vêşanîye'

 

Sehepe vana îdarekarê Zîndanê Alanya seba tepişteyê ke kewtê grevê vêşanîye cezaya dîsîplîn û cezaya hucreyî yewkesî danê. Sehepe derheqê babete de wina va: "Xora domanê ma mîyanê rewşêke xirab de bî, nika zî rewşêka tewr xirab ciwîyenê. Ma wazenê ke vengê xo bidê eşnawitiş. Eke lazim bibo ma do zî bikewê grevê vêşanîye. Bi qasê serrêke bi sebebê pandemî nêverdenê ke ez lajê xo bivîna. Ez nêeşkena derheqê lajê xo de tu zanayîşêk bigîra, kesêk ez pers bikera zî çin o. Gardîyanî zî tu zanayîş nêdanê mi. Gama ke ma şînê pêvînayîş zî cilanê m, ma ra kenê. No zî tena seba merdimê sîyasîyan yeno kerdene. Ez vana ke, 'ez tena lajê xo bivîna bes o' seba nê zulmêk yeno kerdene qebûl kena."

 

'Pêwa pandemî zî her roje erzenê serê koxuşan'

 

Sehepe vana ke mengêk ra reyke yan zî menge ra di rey kontrolê koxuşan ameyîne kerdene, la nika wina nîyo. Hema vajê her roje erzenê serê koxuşan. Sehepe dewam de wina va: "Eke pandemî  û nêweşî esta, çira erzenê serê koxuşan? Ca û cilê tepişteyan bela wila kenê? Kantîn zî zaf vay o, çîyêk teber de 1 lîra bo, zere de 4 lîra yo. Coka zî kesê ke zere de yê, xeylê zehmetî ancenê. Pêro zî domanê min ê. Tu ferqê înan lajê mi ra çin o. Gama ke yew înan ra keweno grev, ê ke nêkewtê zî werd nêwenê."

 

'Wa waştişê tepişteyan bi ca bîyarê'

 

Sehape derheqê lajê xo de vana, o gama ke kewto grevê vêşanîye, tesîrêk negatîf çimê ey rê kerdo û bi mengan dima verçimke dayê ci. Sewbîna awe înan kêfî padanê. Nika zî hûmara tepişteyan koxuşe de 30 derbaz kerda û seba pandemî kesî nêbenê nêweşşxane û va: "Tedayêk pîl kenê. Ma wazenê vera nê vejê. Nika grevo bidor de yêla beno ke grev agêro bêdor. Seba ke domanê ma nêmirê, wa waştişê înan bi ca bîyarê û pêvînayîş bidê destpêkerdene."

 

'Problemê Tirkîya ancax bi mizakere çareser bikerê'

 

Sehape tewr peyîn wina va: "Ganî waştişê derheqê Abdullah Ocalanî de bi ca bêrê. Tirkîya de hemverê problemê ekonomî, weşî û yê sey vatişê, ‘problemê Kurdan’ yenê nimte. Abdullah Ocalan serekê Kurdan o. Bi 20 serrî yo vera nêdanê. Ma êdî nê çî ra vanê bes o. problem tena êkurdan nîyo. Ma wazenê aştî û çareserîyêk bêro vînayene. Ma ca û wareyê xo ra ameyî tîya. Welatê ma ame veşnayene, ame talankerdene. Bi ma şîdet ame kerdene. Ma vanê, êdî bes o."