Rojda Seyidxan

 

QAMIŞLO - Endama Koordînasyonê Kongreya Star a Vakur û Rojhelatê Sûrîye Mûna Yusif, tepiştişê Hemsereka KCDyî Leyla Guven şermezar kerd û wina va: "Dewleta tirkî rayberanê ma hedef gêna ke reyke bîn cinîyan mecbûrê koletî bikera. Ma kede daya seba ke ma cuyêk abi rûmet biciwîyê, serkewtiş ê ma yo."

 

21ê Kanûne de Hemsereka Kongreya Komela Demokratîke (KCD) Leyla Guven 22 serrî û 3 mengî cezaya zîndanî ci rê ameye birnayene û ameye tepiştene. Seranserê dinya de seba paştdayîşê bi Leyla Guven dir çalakî yenê organîzekerdene. Rojawanê  Kurdistanî de zî cinîyê pêro pêameyîşan seba Leyla Guven paştdayîşê xo ramojnenê. Derheqê babete de Endama Koordînasyonê Kongreya Starî ya Vakur û Rojhelatê Sûrîye Mûna Yusif, tepiştişê hemsereka KCDyî Leyla Guven de ercnayîş kerd.

 

'Xoverdayîşê Leyla Guven veng da yo'

 

Mûna destpêk de bale ant serê têkoşînê Leyla Guven a hemverê pêro rengê faşîzmî û wina va: "Destpêk de ma xoverdayîşê hemsereka KCDyî Leyla Guven pîroz vînenê û silam kenê. Waştişê Lelya Guven oyo ke tecrîdo girankerde serê Rayber Apo peynî bibo û aştîyêk mende bi ca bêro. Seba waştişê Leyla Guven bi ca bêrê, lazim o ma heme paştdayîşê aye bikerê. Xoverdayîşê Leyla Guven ê vera faşîzmî veng dayo. Bi tepiştişê aye dir wazenê îradeyê ma cinîyan bişiknê. Dewleta tirkî rayberanê ma hedef gêna ke reyke bîn cinîyan mecbûrê koletî kena. Ma sere dewleta tirkî rê nêdanê ro. Ma do heta peynî seba azadîya tememê cinîyan têkoşîn bikerê."

 

'Têkoşînê ma seba cuyêka bi rûmet o'

 

Mûna dewam de wina va: "Kerdişê Erdoganî derheqê cinîyan de newe nîyo, rojane herêmê Vakur û Rojhelatê Sûrîye de zî kerdiş û hêrişî serê cinîyan de yenê kerdene. Dewleta tirkî wazena ke destkewtişê cinîyan desteser bikera û înan agêrno rewşa destpêkî. Ma nê çî qebul nêkenê, ma kede daya seba ke ma cuyêka bi rûmet biciwîyê. Leyla Guven zî cinîyêka wayîrê têkoşînnêk tarîxî ya. Ma nê kerdişê lêşîn hemverê aye zî qebul nêkenê. Vengdayîşê ma pêro cinîyê dinya rê ke seba azadîya Leyla Guven têkoşîn bikerê. Leyla sembolê aştîye ya."